Header Ads

قصة أيوب - ﺍﻟﺠﺰﺀ 3 -


قصة أيوب
ﺍﻟﺠﺰﺀ 3:
 ﻭﻻﺕ ﻣﺮﻳﻢ ﻛﺎﺗﻜﻮﻧﻴﻜﺘﺎ ﺩﻳﻤﺎ ﻭ ﻭﻟﻴﺖ ﻛﺎﻧﻬﺪﺭ ﻣﻌﺎﻫﺎ ﺣﺘﻰ ﻓﺎﻟﺘﻠﻔﻮﻥ ﻭ
ﻣﺎﺑﻘﻴﻨﺎﺵ ﻣﻜﺘﺎﻓﻴﻴﻦ ﻏﻴﺮ ﺑﺎﻟﻔﻴﺲ .. ﻭﻟﻴﻨﺎ ﻛﺎﻧﻬﺪﺭﻭ ﺣﺘﻰ ﻓﺎﻟﺴﻜﺎﻳﺐ .. ﻭﻻﺕ ﻛﺎﺗﺸﻮﻓﻨﻲ ﻭ
ﻛﺎﻧﺸﻮﻓﻬﺎ .. ﻭﻟﻔﻲ ﺯﺍﺩ ﻟﻤﺮﻳﻢ .. ﻭ ﻗﻠﺖ ﻋﻼﺵ ﺍﻟﻠﻲ ﻣﺎﻧﺘﺰﻭﺝ ﺑﻴﻬﺎ ﻭ ﻧﺠﻴﺒﻬﺎ ﺗﻌﻴﺶ ﻣﻌﺎﻳﺎ
ﻫﻨﺎ ﻓﻜﻨﺪﺍ .. ﻭ ﺩﺍﻛﺸﻲ ﺍﻟﻠﻲ ﻛﺎﻥ ﻃﻠﺒﺖ ﻣﻨﻬﺎ ﺍﻟﺰﻭﺍﺝ ﻭ ﻭﺍﻓﻘﺎﺕ ﻓﺎﻟﺤﻴﻦ .. ﻓﺮﺣﺖ ﺑﺰﺍﻑ
ﻟﻜﻦ ﺍﻻﻣﺮ ﺍﻟﻠﻲ ﻛﺎﻥ ﻛﺎﻳﺜﻴﺮ ﺍﻧﺘﺒﺎﻫﻲ ﻫﻮ ﺍﻥ ﻣﺮﻳﻢ ﻭ ﻻﻭ ﻋﻨﺪﻫﺎ ﺑﺰﺍﻑ ﺩﻳﺎﻝ ﺍﻟﻤﺘﻄﻠﺒﺎﺕ
ﺍﻟﻤﺎﺩﻳﺔ .. ﺑﺪﻳﺖ ﻛﺎﻧﺤﺲ ﺑﺤﺎﻝ ﻳﻼ ﻣﺎﺷﻲ ﺍﻧﺎ ﺍﻟﻠﻲ ﻋﺎﺟﺒﻬﺎ .. ﻋﺎﺟﺒﻴﻨﻬﺎ ﻏﻴﺮ ﺍﻟﻔﻠﻮﺱ ﻭ
ﺍﻟﻤﻈﺎﻫﺮ .. ﻭ ﻟﻜﻦ ﺍﻟﺸﻲﺀ ﺍﻟﻠﻲ ﻣﺨﻠﻴﻨﻲ ﻣﺸﺒﺖ ﺑﻴﻬﺎ ﻫﻮ ﺍﻟﺤﺐ ﺍﻟﻠﻲ ﻭﻟﻴﺖ ﻛﺎﻧﺤﺴﻮ
ﺍﺗﺠﺎﻫﻬﺎ ﻭ ﻫﻲ ﺍﺻﻼ ﺑﻨﺖ ﻋﻤﻲ ﻳﻌﻨﻲ ﻣﺎﺷﻲ ﺑﺮﺍﻧﻴﺔ ﻋﻠﻴﺎ ﻭ ﺗﻨﻘﻮﻝ ﻣﺎﻓﻴﻬﺎ ﺑﺎﺱ ﻳﻼ ﻛﺜﺮﻭ
ﻣﻄﺎﻟﺒﻬﺎ .. ﻛﻨﺖ ﻣﻌﺘﺒﺮ ﺭﺍﺳﻲ ﺧﻮﻫﺎ ﻭ ﺻﺪﻳﻘﻬﺎ ﻭ ﺣﺘﻰ ﺑﺎﺑﺎﻫﺎ .. ﻭ ﻣﻦ ﺍﻟﻤﻔﺮﻭﺽ ﻋﻠﻴﺎ
ﻣﺎﻧﺤﺮﻣﻬﺎ ﻣﻦ ﻭﺍﻟﻮ .. ﻛﺎﻧﺖ ﻛﺎﺗﻄﻠﺐ ﻣﻨﻲ ﺑﺰﺍﻑ ﺩﻳﺎﻝ ﺍﻟﻔﻠﻮﺱ ﺑﺎﺵ ﺗﺸﺮﻱ ﺍﻟﺤﻮﺍﻳﺞ
.. ﻛﺎﻧﺖ ﺩﻳﻤﺎ ﻛﺎﺗﻘﻮﻟﻲ ﺧﺎﺻﻨﻲ ﻧﺒﺎﻥ ﻋﻠﻰ ﺍﻟﺒﻨﺎﺕ ﺭﺍﻧﻲ ﻗﻠﺘﻠﻬﻢ ﺭﺍﻧﻲ ﺗﺨﻄﺒﺖ ﻟﻮﻟﺪ ﻋﻤﻲ
ﻃﺒﻴﺐ ﻓﻜﻨﺪﺍ ...ﻛﻨﺖ ﻛﺎﻧﻘﻮﻝ ﻣﺎﻋﻠﻴﺶ ﻣﺎﺯﺍﻻ ﺻﻐﻴﺮﺓ ﻧﺨﻠﻴﻬﺎ ﺗﻌﻴﺶ ﺣﻴﺎﺗﻬﺎ ﻛﻨﺮﺳﻠﻬﺎ
ﺍﻟﻔﻠﻮﺱ .. ﺑﺪﺍ ﻃﻤﻌﻬﺎ ﻛﺎﻳﺘﺰﺍﺩ ﻭ ﻃﻠﺒﺎﺕ ﻣﻨﻲ ﺑﺎﺵ ﺗﺪﻭﺯ ﻟﺒﻴﺮﻣﻲ ﻭ ﻟﺒﻴﺖ ﻃﺎﻟﺒﻬﺎ 

ﺟﺎ ﺍﻟﺼﻴﻒ ﻭ ﺷﺪﻳﺖ ﺍﻟﻜﻮﻧﺠﻲ ﻭ ﻣﺸﻴﺖ ﻟﻠﺒﻼﺩ .. ﻗﻠﺖ ﻟﻠﻮﺍﻟﺪﺓ ﺩﻳﺎﻟﻲ ﺑﻠﻲ
ﺑﺎﻏﻲ ﻧﺨﻄﺐ ﻣﺮﻳﻢ ﺑﻨﺖ ﻋﻤﻲ ﻭﺍﻓﻘﺎﺕ ﻭ ﻓﺮﺣﺎﺕ ﺑﺰﺍﻑ .. ﻗﺎﻟﺘﻠﻲ ﺭﺍﻫﺎ ﺑﻨﺖ ﻋﻤﻚ ﻭﺑﺎﺑﺎﻫﺎ
ﻣﻴﺖ ﺍﺣﺴﻦ ﺣﺎﺟﺔ ﺗﺪﻳﺮ ﻫﻲ ﺍﻧﻚ ﺗﺘﺰﻭﺟﻬﺎ ... ﻗﺒﻞ ﻣﺎﻧﺠﻲ ﻟﻠﻤﻐﺮﺏ ﻃﻠﺒﺎﺕ ﻣﻨﻲ ﻣﺮﻳﻢ ﺑﺎﺵ
ﻧﺸﺮﻳﻠﻬﺎ ﺍﻟﺤﻮﺍﻳﺞ ﻭ ﺍﻟﻤﺎﻛﻴﺎﺝ ﻣﻦ ﻛﻨﺪﺍ ﺑﻐﺎﺕ ﺍﻟﻤﺎﺭﻛﺎﺕ ﺩﻳﺎﻝ ﺍﻟﺨﺎﺭﺝ .. ﺍﻟﻤﻬﻢ ﻣﺸﻴﺖ ﺍﻧﺎ ﻭ
ﺍﺧﺘﻲ ﻏﻴﺜﺔ ﺣﺘﻰ ﻫﻲ ﻋﺎﻳﺸﺔ ﻓﻜﻨﺪﺍ .. ﻣﺸﺎﺕ ﻣﻌﺎﻳﺎ ﺷﺮﻳﻨﺎ ﻟﻤﺮﻳﻢ ﺩﺍﻛﺸﻲ ﺍﻟﻠﻲ ﺑﻐﺎﺕ ﺣﻴﺚ
ﺍﻧﺎ ﻣﺎﻛﺎﻧﻔﻬﻤﺶ ﻓﺪﺍﻛﺸﻲ .. ﻭ ﻣﻦ ﺑﻌﺪ ﻣﺸﻴﻨﺎ ﻟﻠﺒﻼﺩ ﻟﻠﺪﺍﺭ ﺍﻟﺒﻴﻀﺎﺀ ﻭ ﻗﺮﺭﻧﺎ ﺑﺎﺵ ﻧﻤﺸﻲ
ﺍﻧﺎ ﻭ ﺍﻟﻮﺍﻟﺪﺓ ﻭ ﺧﻮﺗﻲ ﻟﻤﺮﺍﻛﺶ ﻧﺨﻄﺒﻮ ﻣﺮﻳﻢ ﻭ ﻧﺪﻳﺮﻭ ﺍﻟﻌﻘﺪ ﺑﺎﺵ ﻧﺒﺪﺍﻭ ﺑﺈﺟﺮﺍﺀﺍﺕ
ﺍﻻﻭﺭﺍﻕ ﺑﺎﺵ ﻧﺪﻱ ﻣﺮﻳﻢ ﻣﻌﺎﻳﺎ ﻟﻜﻨﺪﺍ .. ﻓﺎﺵ ﻭﺻﻠﻨﺎ ﻓﺮﺣﻮ ﺑﻴﻨﺎ ﺑﺰﺍﻑ .. ﺑﺮﻏﻢ ﺑﺴﺎﻃﺘﻬﻢ
ﺍﺳﺘﻘﺒﻠﻮﻧﺎ ﻣﺰﻳﺎﻥ ﻭ ﻛﺎﻧﻮ ﻃﺎﻳﺮﻳﻦ ﺑﺎﻟﻔﺮﺣﺔ ..ﺩﺭﻧﺎ ﺍﻟﺨﻄﻮﺑﺔ ﻭ ﺍﻟﻌﻘﺪ ﻭ ﻭﻻﺕ ﻣﺮﻳﻢ ﻣﺮﺍﺗﻲ
.. ﺳﺎﺭﻳﺘﻬﺎ ﺍﻟﺒﻼﺩ .. ﻭ ﻭﻟﻴﻨﺎ ﺗﺎﻧﻤﺸﻴﻮ ﻏﻴﺮ ﻝ ﻟﻴﺮﻳﺴﻄﻮ ﺍﻟﻤﺰﻳﺎﻧﻴﻦ ﻭ ﺍﻻﻭﻃﻴﻼﺕ ﺍﻟﻤﻌﺮﻭﻓﻴﻦ
ﺧﻤﺲ ﻧﺠﻮﻡ 

ليست هناك تعليقات