قصة غزلان " عمرها تفرح بيك " - الجزء 2
قصة غزلان " عمرها تفرح بيك "
- الجزء 2
مهم نكملو كيف قلت ليكم انا دابا بدون عمل ولاكن الحمد الله بخيير ممحتاجاش الخدمة عايشة لخروج سفر فلوس موجودين من ناحية العائلة الحمد الله بخير مكان حتى مشكل ولاكن المشكل لي عندي هو نبيل من نهار شفت كمارتو ما شفت نهار زين وليت بحال المحقق كونان غي لاحقاه و كنخبش و نبش موراه هو مسكين معارف والو اش كيوقع حيت اصلا مكيعرفينيش و مكيشوفنيش واخا نكون حداه و هاد شي كيهبلني وكيخليني نتسطا واش انا خايبة لهاد الدرجة كامل صحابو لي كيكونو معاه بغاو يتعرفو عليا الا هو ايمان دايالو العقل والقلب وعينيه حتى هوما
بغيتو تفهمو ياك تلفتكم مهم نبيل اول مرة شفتو هادي عامين شفتو ف شركة فين كنت خدامة كان صاحب شاف ماشي شاف لي حيحت عليه لا لي قبلو راه قلت ليكم خدمت بزاف الخدمات ركزو معايا ههه
مهم كان جا لشركة على ود شي خدمة بيناتهم وانا ل قاديت ليه الامور كان كالس ف كرسي ديال بيرو ديالي و انا كنكتب ليه ف pc la facture
وكيعطيني المعلومات ديالو منهم الاسم ديالو تما عرفت سميو نبيل وتما قلبي خداه معاه و خلاني تالفة من داك نهار وانا نصبح على صورتو و نعس بيها غاتقولو مين جاتني غنقولكم خديت سميتو و قلبت عليها ف فيسبوك و لقيت فيس ديالو و اكيد دخلتو عندي ولاكن ماشي ب فيس ديالي ب فيس اخور ب اسم اخور على اساس انا بنت ساكنة ف مدينة غير مدينتو باش ميشكش رجع عندي ف فيس لي درتو باسم مستعار ورجعت مدمنة على فيس كندخل ليه ديما نشوف نبيل اش حط و اش كيقول كنقرا ل statut لي كيحط و عرفت عليه كلشي و حتى من عائلتو عرفتها ولاكن يا فرحة ما تمت من خلال الصور ديالو و تعليقات لي كيعلق هو و حتى ناس كتفشت ايمان صفيريطة حبيبتو لي كانت ديما كتعلق ف تصاور ديالو با حبيبي شيري بيبي نبغيك نموت عليك نتا حياتي و هو كذلك لا يبخل عليها بالكلام الجميل و رومانسي يا سلام يعطيه حبة ف لسان هوما عايشين الحب وانا نتفقص كنت مين نقرا شي تعليق بيناتهم ولا نشوف شي صورة مع بعضياتهم كنموت بالغيرة و نبات نحسب دموعي ولي كيزيد يفقصني مين يحكيلي عليها و على شحال كيبغيها و يتمنى داك نهار لي تكون مرتو (يحكيلي زعمة على اساس انا ديك البنت لي عندو ف الفيس لي هي انا ولاكن هو معارفش بلي هي انا هههه دوختكم انا عارفة اوا فهمو راسكم بلا منبقا نشرح ) مهم رجعنا اصدقاء ف فيس لي دايراه ب اسم كوتر رجع يحكي لكوتر كلشي شنو يبغي شنو يكره و على ايمان وكيف تلاقاها و شحال يبغيها كنت كنصحو و كنصبرو الى كان مخاصم معاها وانا كنبكي هو يقرا الكتبة لي كنكتب ليه و يشكرنني حيت عااونتو و نصحتو ميتخلاش على اييمان و يصبر معاها و مشايفش دموعي لي كانت تهبط من عيني وانا كنقولو يبقا مع لي كيبغي كنقولها و انا كنتقطع هاد شي ف الاول لاكن دابا مبقيتش نبكي حيت تعودت على هاد شي حيت كيتخاصمو بزاف حتى دموعي نشفو ف كل مرة كيحكيلي وانا نصح فيه على اساس انا كوتر
دازت عامين وانا نبغيه غ ف صمت و عن بعد كان دايما كيكلس مع صحابو ف كافي كتعجبو وانا ديما كناخد سهام معاايا ونمشي نكلس مقابلاه و نشوف فيه هو والا على بالو وكانني غير موجودة شي مرات غنبغي نمشي عندو نقولو انا كوتر حيت كانت عزيزة عليه و كيحكيلها كلشي و كيفوولها كرتاحلك نتي الوحيدة لي كنحكيلك اسراري ولاكن الى عرف كوتر هي انا غادي يتقلق و مغاديش نبقى نعرف عليه والو و نخسرو ف مرة بقيت صابرة صابرة عامين وليوم شهر مشفتو توحشتو وعرفت منو ف فيس راه جاي وغادي يفطر ليوم مع صحابو داك شي علاش صبحت على سهام صاحبتي و عشيرتي ولوحيدة لي كتهزلي هبالي و صابرالي على جنوني... يلاه انا وصلت عندها و خليكم معايا نكملو القصة و نعرفو شكون غادي تربح انا ولا صفيريطة سبحان الله مكنحملهاش واخا مكنعرفهاش ولاكن بيني و بينكم قوقة و زين ديالها يطيح زرزور من الصور :p
هاني داخلة عند سهام دابا باش نمشيو ل كافي نشوف لحووب...
3.. عمرها تفرح بيك...نتا اناا
غزلان:: صباح الخير خالتي لباس عليك سهام فاقت ولا ناعسة
ام سهام:: صباح نور شنيولة مالك على هاد المجية يا ديك جنية علاياش معولة
غزلان:: هههه والو خالتي بغيت ندي سهام معايا نفطرو برا و نقلبو على خدمة راه كرهنا العطالة و البطالة
ام سهام:: احياني عليك كتسلكي راسك تقلبي على خدمة لوكان غي منعرفكش غ انا قلبتلك على 3 دلخدمات مبغيتيش
غزلان:: اخالتو لخدمات لي قلبتيلي عليهم باين العربون من نهار لول غادي نخرج و زايدون مبغيتش نحشمك مع ناس حيت عارفة راسي ام المشاكل غادي نوض روينة و نتي تحصلي
ام سهام:: يا شلاهبية منقدش عليك دخلي عند سهام راها ف بيتها انا خارجة نخدم تعطلت
غزلان:: سوسو وايلي مزال ناعسة ناري لاااااا بصح ولا كضحكي معايا نوضي راه نبيل يكون فطر و كمل
سهام:: واا شكون مالكوم
غزلان:: نوضي لموك اشمن شكون كاضحكي عليا رجعتي نعستي ياك العفريتة صبري انوريك
سهام:: واااا اش هاد شي غزلان حرام عليك ديما نقولك متفيقينيش ب هاد طريقة
غزلان؛: اصلا جربت جميع طرق معاك منفعني غي الما البارد فريش باش تعاودي ديريها بيا
سهام:: هانا فايقة صافي غلبس حوايجي سيري سبقيني
(بعد 5 دقائق دخلت لقيتها رجعت نعست كتفلا عليا)
سهام:: صافي صافي هاااني هاني فقت والله منعاود غزلان طفي شمعة نار لاااا راك حرقتيلي رجلي هبيلة نتي موتي على يديك شي نهار تجيبيلي سكتة قلبية نتي
غزلان:: هههههه مزيانة فيك باش عمرك تفكري ديري هاد الخدمة ديالك بسالا يلاه لبسي يلاه سربيي
(لبست سهام و خرجنا وصلنا ل كافي عارفة نبيل كايبغي يكلس لفوق قبل منطلعو )
سهام:: وا ديك لهبييلة فين غادا دروج منا واش عميتي صافي دختي قبل متشوفيه
غزلان:: هاتي داك صاك هاتي و تبعيني و سكتي
سهام:: اويلي انا جيباني ل طواليط اش درت انا ف حياتي باش تبليت بيك
غزلان:: هاكي صاكك خاوي بحالك مفيه لا مكياج لا ريحة جايبة معايا ولد عمي
سهام:: مكياج و ريحة !!! واش نتي خاطفاني من بلاستي ل هنا مخليتيليش فرصة حتى نغسل وجهي بعدا فكرتيني نغسل كمارتي عينيا باقين ب عمشهم
غزلان:: غسلي عمشك خليني ندير فنون تشكيلية ف وجهي قبل منطلعو لفوق لا على وا عسا نبيل يشوف فيا ليوم يعطيه لعما فقصني
ختي عندك مكياج الى جات على خاطرك هاد صاحبتي فيقاتني على صباح باش نجي معاها مخلاتليش فرصة نقاد راسي ولا نجيب معايا شي مكياج
البنت:: حبيبة معنديش حيت ممحتاجاش ليه وزيدون راه وجهك عامر مكياج فين باغا تزيدي مبقات حتى بلاصة فيه خاوية
غزلان:: شناااهوا ؟؟!! يمكن احبيبة عمرك شفتي ف مرايا ها هي فرصة نيت ششوفي راسك باش تخلعي هاد صباح و متعوديش طيري و تنزلي انا سولتك جاوبي على قد سؤال بلا متفلسفي عليا و نتي صاكك هو لي داودية كتقلب عليه لوكان نحلوه لقااو ل catalogue ديال avon كامل تما ونزيدك....
(جاب الله سهام جراتني من يدي و خرجاتني كنت غادي ندير ليها الوقفة المشهورة ديال بنات سوق و نوريها لفهامات عصباتني..)
سهام:: واش تي مسطية فين ما مشيتي دايرة حالة
غزلان:: دايرة حالة ف رجالة كلشي يغوت يا لغزالة هههه خليني اصحبتي نفرجك فيها لفرفورة فليفلة قاتلك وجهي عامر معندي فين نزيد حشيان الهضرة
سهام:: حتى نتي ملقيتي مديري ماشيا تسلفي مكياج منها فين كتعرفيها
غزلان:: اش فيها الناس ل بعثيييهااا يا حبيبتي ههه
سهام:: والله النفس ماعندك زيدي طلعي طلقينا شوفي داك بوركابي بغيتلو شلل الاطفال نتهنا منو هو سباب عدابي
ليست هناك تعليقات