قصة غزلان " عمرها تفرح بيك " - الجزء 4
قصة غزلان " عمرها تفرح بيك "
- الجزء 4
الام:: غزلان ها سخط ابنتي خلي خالتك ف تيقار الى قاتلك شي حاجة سكتي راك عارفاها غ تهضر و صافي خليها تقول ما بغات
غزلان:: ماما راه كتزيد فييه تمشي تقابل بناتها وهي حاضباني امتى نتزوج واراجل هرباتولي بنتها اش بغاتلي
الام::صافي سكتي راه خالتك كتشوف فينا و الى قاتلك شي حاجة ديري راسك دمدومة مكتفهميش
غزلان:: اوووه طاتي ساسا مرحبا صباح الخير جيتي بحدك فين البنات
الخالة:: وي حبيبة سافا البنات مشاو يتقضاو الحوايح راك عارفة سوسن بنتي عرسها قرب العقوبة ليك اجي نتي امتى نفرحو بيك راك كبرتي
غزلان:: اوا طاطا مين طلق سوسن نتزوج راجلها ان شاء الله
الخالة:: اممم باقيا باسلة و ضحكك كيفك سوسن راجلها كيحماق عليها و عمرو يفكر يطلقها اوا ف عرسها لعبي خفيف و شوفيلك شي عريس راه راجل سوسن من شمال و نتي عارفة شماليين زين كيداير واحد ينسيك ف لي قبلو بصح راك ضعافيتي زيدي شوية باش فالعرس تباني غزالة مالك وليتي هاكاا
غزلان::ختك مكتوكلنيش داك شي علاش ضعافيت
الام:: هههه شفتي اختي غزلان شحال فيها ديال ضحك هاكا نهار كامل كتشد فينا عندنا سيكتور ف دار ههه
الخالة:: اوا بسيف حيت قلت ميدار لوكان كانت خدامة غادي تعمر وقتها و متلقاش وقت للضحك ياك اغزلان
غزلان:: طبيب مانع عليا نخدم(قبل منكل لجملة جاءتني قرصة ف رجيلاتي من تحت طابلة من يدي امي العزيزة الحنونة تعني انني كترت وزدت فيه وانا نبدل مسار جملتي لي كانت خارجة وصححتها من الى) طبيب قالي مخاصكش تبقاي مدة طويلة حدا شاشة ديال حاسوب عندي حساسية ف عيني داك شي علاش اني كالسة حيت خدمتي كلها ف pc
الخالة::اوا بقاي ف دار حسن متعماي راه لعنين هوما كلشي
غزلان::( فخاطري : واش غتحشمي ولا نوض ندير فيك شرع يديا حسابك نسيت اش دارت بنتك فيا شحال هادي ولاكن دعيتك لله نتي و بنتك)
الام:: غزلان نوضي جيبي ل خالتك عصير ف تلاجة عاد درتو يكون برد
(مشيت لكوزينة وبلا منحس بديت نبكي تفكرت هاد خالتي شريرة بنتها اش دارت فيا هادي 5 سنين كان يسكن حدا جدتي واحد الولد سميتو عماد كنا كامل بنات العائلة كنحماقو عليه ملي كنا صغار كنمشيو عند جدة غي باش نشوفوه و لعبو معاه عروسة عريس هه كنا كندابزو ديما عليه شكون تكون عروسة ديال عماد وهو دائما كان يختارني وكبرنا ولعبة تحولت لحقيقة وعماد بعد ما مشا المانيا ودار مستقبل رجع وخطبني كنت اسعد انسانة على وجه الارض ولاكن الفرحة مكملتش..
...عمرها تفرح بيك...نتا ليا اناا
من بعد ما خطبني ودرنا لملاك و ركبنا خواتم كنا مفاهمين على كلشي و كنستنى صيف يجي باش نديرو العرس و ف نهار جات مو عندنا انا شفتها حسيت كاين شي حاجة حيت عماد سيمانة مصوناش كنعيط ليه تلفون مطفي كنت كنقول يمكن الخدمة ولا شي حاجة نصبر منخلعش دارهم و دارنا حتى يبان عليه خبر و سكت حتى جات مو و قالت لماما سمحولينا مغديش عماد يكمل مع بنتكم بنتكم غا تبقى عندكم مكتابش نكملو انا مفهمت والو بغيتها تفهمني علاش اش وقع شنو سبب؛؟؟ قالت معنديش جواب هادي رغبة ديال عماد بقيت شهر وانا مريضة و كنبكي و باغيا نعرف غي سبب حتى واحد نهار دخلت فيس نشوف لقيتو مبلوكيني و بقيت نقلب ومع انا محقق كوناان بقيت نخبش ف فيس ديال عماد لي دخلت ليه من فيس جديد ولقيت عندو واحد فيس مغريبش عليا و تفكرت سوسن واحد نهار طلبت مني نفتح ليها كونط جديد تبقى ضحك بيه على بنات يكون بااسم دري هنا دخلني شك و بغيت نحل هاد فيس تلفلي ل ايميل باش فتحتو ليها و بقيت نحبش و نبش حتى لقيت لحنش ههه جربت جميع الايمايلات وشوية تفكرت الكلمة الاولى من الايميل و كتبتها خرجلي حيت كان enregistrer تما و مودباس كنت عاقلة عليه دخلت و مشيت ل ميساجات لقيتها مسيفطا ل عماد ميساج فيه سلام خويا انا حبيب غزلان و راه كنبغيو بعضياتنا الى كنتي راجل بعد منها راه هي ناوية تزوج بيك دير لوراق و ترجع عندي ويلا متقتش شوف تصاور راه كنتلاقاو مزال رد عليه عماد قالو يمكن يكونو عندك تصاور قداام قبل منخطب غزلان انا منحكمش على غزلان من تصاور قداام واصلا مفيهم حتى حاجة عاديين 2 كالسين ف كافي عادي بنت لفعة لي دايرة راسها ولد مخططة مزيان هي تجاوبو شوف اش لابسة غادي تعرف بلي كنتلاقاو مور الخطوبة وانا ف الصورة لابسة كسوة عماد سيفطهالي مع ختو من جات من المانيا هنا عماد مرجعش جاوبو غتقولو اوا اش داك تخرجي مع شي واحد و نتي مخطوبة غنجاوبكم متيقوش حتى ف بنات الخوالات راه حتى واحد ميبغيلك الخير لفعة ديال سوسن كانت ميتة بالغيرة حيت عماد خطبني انا و معبرهاش خططت و نفدت خطتها ب كل برودة قبل ماعماد يسمح فيا ب10ايام جات سوسن لدار تزاوك فيا نخرج معاها تلاقا مع واحد دري عاد تعرفت عليه و خايفة تخرج بحدها معاد و بغاتني نشوفو باش نقولها واش زين و بقات شادا فيا وتزارك و بحكم انني بهلولة و دمدومة فيا غي بلا بلا بدون فائدة وافقت و انا كلبس حوايجي جات لسقتني و بقات هي تلبسني قاتلك باش نبان زينة كتبغيلي لخير قاتلي لبسي كسوة ديال عماد جديدة كتجيك غزالة تهبلي فيها لبستها انا و مشيت معاها كلسنا ف كافي فعلا جا دري متعرفة عليه مسكين هو ما فراسو والو عادي كنهضرو و هو بنيتو كيقولي عجباتني بنت خالتك شوية ناضت لفعة تمشي قاتلك طواليت تما خدمت شغل يديها و صورتنا انا وياه واخا ديك الكلسة كانت بريئة و مفيها حتى شي حاجة لي تسيئ ل عماد حيت هي مشات و حنا بقينا ساكتين حتى جات ولاكن هي كانت مخططة ل هاد شي ومن مور معرفت مرضت كتر حيت تقت فيها و غدراتني و هي اقرب ناس ليا كنا صحابات ناض صدااع كبير فضحتها ف العائلة كاملة و عام والعائلة ديالي مكتهضرش معاهم كاملين ولاكن ماما و خالتي رجعو يهضرو حيت خواتات و لي صرا تنسا بالنسبة ليهم اما انا عمري نسا اش دارت فيا و لحد الان مكنهضرش معاها و حتى عرسها مغنحضرش ليه واخا واحد راس كيقولي ندير فيها بحال لي دارتلي ولاكن انا ماشي بحالها دعيتها لله و وكلت امري ليه هو يجيبلي حقي منها الحمد الله على كل حال اصلا لوكان كنت تزوجت عماد كاع منشوف ونبغي نبيل نهار شفت نبيل عاد عرفت شنو هو الحب اما عماد كان غ عناد ديال بنات الخوالات زعمة انا الواعرة ديتولكم مكان لا حب لا زعتر الحووب هو نبيل احياني ماما كتغوت نسيت العصير تشرب فيه السم انمسح عينيا و نديلها تشرب لعصير و نبدل حوايجي نمشي عند سوسو نبرزطها شوية )
سهام:: جيتي كنت عارفاك غادي تصبحي عليا داك شي علاش لعبت خفيف و هضرت مع عبدو قبل متجي ديريلي الارارا
غزلان:: حلفي با الله حتى هضرتي مع عبدو اش قلتيلو و شنو قاليك و كيعرف نبيل من امتى وفين و ..
سهام:: او اووو ا بلاتي عليك لا زربة على صلاح اجي دخلي كوزينة سخني صبيعاتك و عاونيني فل غدا و نحكيلك و حنا كنطيبو
ليست هناك تعليقات