قصة كريم فالمدينة - الجزء 21
الجزء 21
قبل ما يسافرو ، خلاو الورقة عند بات مروان باش ما تلفش ليهوم فالسفر ، و لكن ما قالوش ليه علاش ، و داو معاهوم الساروت ، قادو الفيديو اللي غيدوز فالتلفزة على قبل الإختفاء د امال ، عطاوه لداك رشيد ( السيد اللي سجل الأغنية د امال ) و اللي ماكان عندو حتى مشكل باش يتعاون معاهوم ، صافي و قلعو
السكانير و ولدو زاك ما بقاو فاهمين والو ، و بداو كايتنواو غير بوحدهم ، أااو الساروت كيتحول من بلاصة لبلاصة ، من بعد ما كان فالشمال و تحول للجنوب ، هاهو دابا كيرجع للشمال عوتاني
زاك : هادوا بانو ليا دايرين هاد الفيلم كامل غير باش يصيدونا
السكانير : لا لا ما كانضنش ، و لكن اللي قدرت نفهم من هادشي كامل هو أن الشارف كان غيبيع الساروت لشي وحدين و متفاهموش على الثمن
زاك : و لكن علاش غيبيعو و هو يقدر ياخد الفلوس براسو من الكنز ، شنو زعما يقدر يكون الكنز فيه شي حاجة من غير الفلوس ؟!!
السكانير : شووف دابا حنا ما متأكدين من والو ، اللي كنعرف أنا هو خاصنا نلقاو الكنز
زاك : دابا شنو نرجعو لهيه تاني ؟
السكانير : شوف ليا العنوان ديال أخر دار توقفو فيها و نشوفو شغانديرو معاهم
كريم ملاك و مروان وصلوا لدار جداهوم ، قالوا لهوم المعهد باقي بعيد شوية و ماسخيناش بيكوم و جينا نكملو معكم شي يامات ، الجد و الجدة فرحو ، و عاودو حطوا الساروت فالكوفر ، و مع حطوه و هي تصوني عند زاك واحد اللعيبة و فقد الإتصال بيهوم ، صافي صعروا هو و باه و مشاو لأخر دار توقفوا فيها KMM ، و اللي هي بطبيعة الحال دار مروان ، و بات مروان شاف ديك الورقة و تمعن فيها مزيان و فهم البلان ضاير على شي كنز
وصل ليهم السكانير و زاك ، و مع حل ليهوم بات مروان الباب ، و هوما ينزلوا عليه ، و كتفوه هو و مراتو :
السكانير : فين الساروت ؟
بات مروان : إنا ساروت ؟!! أنا عندي غا الساروت ديال الدار !!
زاك : شووف بلاما دير فيها مافاهم والو ! أتجبد دابا الساروت د الكنز و لا قول بسلامة لمراتك
بات مروان : لا لا هي لا...(و مع ضور ديك الكنز فراسو و هو يتفكر الورقة) آه نتوما كاتهضرو على الورقة !!
زاك : وا إنا ورقة !!! وا جبد الساروت و لا ماغايعجبك حال
السكانير : بلاتي بلاتي ، خلي نشوف هاد الورقة كدايرة !!
بات مروان : ها هي فالجيب ديالي جبدها
السكانير : وااش تا تسطا عليا و لا مالك ، أنا هادشي را حاافضو !!
( و هو يهبط عليه زاك بتصرفيقة )
بات مروان : (مخلوع) هادشي لي عطاني ولدي مروان
زاك : مروان !!! هااااا شتي الواليد را بنادم كاموني ، تصرفيقا وحدة ها هو بدا يغر
السكانير : ارا النمرة ديال هاد ولدك
و كريم ملاك و مروان كيف العادة ما فراسهوم ما يتعاود و تيتسناو غير بعد الغد باش يدوز داك البلان د امال فالتلفزة و تحرك القضية فالمدينة ، يا تا عيط ليه السكانير
مروان : ألو وي شكون معايا
السكانير : شووف البرهوش ، اللي نطولوه نقصروه ، أتجبد الساروت ولا ترحم على واليديك ( و دار التليفون حدا فم مو )
مت مروان : عفاك أ ولدي عطيهوم اش بغاو !!
مروان ما عرف منين نزل عليه هادشي ، تخلع و ماعرف مايقول
يتبع..
ليست هناك تعليقات