قصة بنت الخيرية - الجزء 6
قصة بنت الخيرية
- الجزء 6
ﻧﻬﺎﺭ ﺍﻟﺨﻤﻴﺲ ﻛﻨﺖ ﺭﺍﺟﻌﺔ ﻣﻦ ﻻﻓﺎﻙ ﺟﻴﻬﺖ 4h ﺗﺎﺻﻼﺕ ﺑﻴﺎ ﻭﺭﺩﺓ ﻭ ﺣﺴﻴﺖ ﺑﺮﺍﺳﻲ ﻗﻔﺮﺗﻬﺎ 3 ! ﺃﻳﺎﻡ ﻭ ﻣﺎ ﺟﺎﺗﻨﻴﺶ ﺍﻟﻔﻜﺮﺓ ﻧﺴﻮﻝ ﻋﻠﻴﻬﺎ ﻛﻴﻒ ﻭﺻﻼﺕ ﻭ ﻻ ﻛﻴﻒ ﺩﺍﻳﺮﺓ ! ﻓﺎﻟﺤﻘﻴﻘﺔ ﺑﺰﺍﻑ ﺩﺍﻟﺤﻮﺍﻳﺞ ﻧﺎﻗﺼﻨﻲ ! ﻣﺎ ﺭﺗﺎﺣﺖ ﺣﺘﻰ ﺣﺴﻴﺖ ﻣﻦ ﺍﻟﻨﺒﺮﺓ ﺩﻳﺎﻝ ﺻﻮﺗﻬﺎ ﺍﻥ ﻣﺎ ﻋﻨﺪﻫﺎ ﺣﺘﻰ ﻣﺆﺍﺧﺬﺓ . ﺳﻠﻤﺎﺕ ﻋﻠﻴﺎ ﻭ ﻗﺎﻟﺖ ﻏﺎﺗﻜﻮﻥ ﻋﻨﺪﻱ ﻣﻦ ﺑﻌﺪ ﺳﺎﻋﺔ ﻭ ﺧﺎﺹ ﺗﻠﻘﺎﻧﻲ ﻣﻮﺟﻮﺩﺓ . ﺍﻟﺒﺎﺭﺡ ﻭﺩﻋﺖ ﺍﻟﺴﺮﺑﻴﺎﺕ ﺑﻼ ﻣﺎ ﻧﻌﻄﻴﻬﻢ ﺍﻟﺘﻔﺎﺻﻴﻞ . ﻧﺠﺎﺓ ﺣﺎﻭﻻﺕ ﻣﻌﺎﻳﺎ، ﻓﺎﻟﺨﺮ ﻓﻬﻤﺎﺕ ﺑﻠﻲ ﻣﺎ ﻏﺎﺗﺪﻱ ﻣﻨﻲ ﻭﺍﻟﻮ ! ﺳﻮﻻﺕ ﻋﻠﻰ ﻭﺭﺩﺓ ﻭ ﺍﻟﺴﺒﺐ ﻋﻼﺵ ﻣﺎ ﺑﻘﺎﺗﺶ ﻛﺎﺗﺠﻲ ﻟﻠﻘﻬﻮﺓ، ﻗﻠﺘﻠﻬﺎ ﻫﻲ ﺣﺮﺓ ﺗﺠﻲ ﻭﻗﺖ ﻣﺎ ﺑﻐﺎﺕ ! ﻟﻜﻦ ﺍﻟﻤﻔﺎﺟﺄﺓ ﻫﻲ ﻣﻠﻲ ﻗﺎﻟﺖ ﻟﻲ ﻧﺠﺎﺓ : ﺍﺳﻤﺤﻲ ﻟﻴﺎ ﺧﺘﻲ ﻧﺴﺮﻳﻦ ﺑﻐﻴﺖ ﻧﻘﻮﻟﻴﻚ ﺷﻲ ﺣﺎﺟﺔ ﺷﺤﺎﻝ ﻫﺎﺩﻱ ﻭ ﻣﺎ ﻗﺪﺭﺗﺶ ! ﺩﺍﺑﺎ ﻣﻠﻲ ﻏﺎﺗﻤﺸﻲ ﻗﻠﺖ ﻣﻊ ﺭﺍﺳﻲ ﻻﺑﺪ ﺗﻜﻮﻥ ﻓﺨﺒﺎﺭﻙ ! ﺑﻼ ﻣﺎ ﻧﻔﻜﺮ ﻗﻠﺖ : ﺍﻟﻠﻪ ﺍﺳﻤﻌﻨﺎ ﺧﺒﺎﺭ ﺍﻟﺨﻴﺮ ! ﻳﺎﻙ ﻻﺑﺎﺱ؟ ﺳﻜﺘﺎﺕ ﺷﻮﻳﺔ ﻭﻗﺎﻟﺖ : ﻭﺭﺩﺓ ﻣﺎﺷﻲ ﻣﻦ ﺍﻟﻜﻠﻴﺎﻥ ﺍﻟﻘﺪﺍﻡ ! ﺍﻧﺘﻲ ﺳﺒﻘﺘﻴﻬﺎ ﻟﻠﻘﻬﻮﺓ ! ﺍﻭﻝ ﻣﺮﺓ ﺟﺎﺕ ﺳﻮﻻﺕ ﻋﻠﻴﻚ ﻭ ﻗﻠﻨﺎ ﻟﻴﻬﺎ ﺍﻧﻚ ﻛﺎﺗﺨﺪﻣﻲ ﺑﺎﻟﻠﻴﻞ . ﻣﻦ ﺩﺍﻙ ﺍﻟﻨﻬﺎﺭ ﻭﻻﺕ ﻛﺎﺗﺠﻲ ﻣﻠﻲ ﻛﺎﺗﻜﻮﻧﻲ ﻓﺎﻟﺴﺮﺑﻴﺲ . ﺑﻐﻴﻨﺎ ﻧﻘﻮﻟﻮﻫﺎ ﻟﻴﻚ ﺧﻔﻨﺎ ﺗﻜﻮﻥ ﺟﺎﻣﻌﺎﻛﻢ ﺷﻲ ﻋﻼﻗﺔ ﺧﺎﺻﺔ ﻭ ﻣﺎﺷﻲ ﻣﻦ ﺣﻘﻨﺎ ﻧﻜﻮﻧﻮ ﻓﻀﻮﻟﻴﻴﻦ !
ﻫﺎﺩ ﺍﻟﺨﺒﺮ ﺣﻴﺮﻧﻲ ﻭ ﻗﺮﺭﺕ ﻣﺎ ﻧﻌﻄﻴﻬﺶ ﺷﻲ ﺍﻫﻤﻴﺔ ﻛﺒﻴﺮﺓ . ﺍﻣﻜﻦ ﺷﻲ ﺣﺪ ﺗﺎﻳﻌﺮﻓﻨﻲ ﻫﻮ ﺍﻟﻠﻲ ﻫﻀﺮ ﻟﻮﺭﺩﺓ ﻋﻠﻴﺎ . ﻣﺪﺍﻡ ﻣﺎ ﻋﻤﺮﻫﺎ ﺟﺒﺪﺍﺕ ﻫﺎﺩ ﺍﻟﻤﻮﺿﻮﻉ ﻻﺵ ﻏﺎﻧﺼﺪﻉ ﺭﺍﺳﻲ؟ ﺧﺪﻳﺖ ﺍﻷﺟﺮﺓ ﺩﻳﺎﻟﻲ ﻣﻦ ﻋﻨﺪ ﺍﻟﺒﺎﻃﺮﻭﻥ ﻭ ﻋﻠﻤﺖ ﺍﻟﺒﻨﺎﺕ ﻓﺎﻟﺪﺍﺭ ﺃﻥ ﻫﺬﺍ ﺁﺧﺮ ﻧﻬﺎﺭ ﻟﻴﺎ ﻣﻌﺎﻫﻢ . ﻓﺎﻟﺤﻘﻴﻘﺔ ﻣﺎ ﺷﻔﺖ ﻣﻨﻬﻢ ﻏﻴﺮ ﺍﻟﺨﻴﺮ ﻭﺍﺧﺎ ﻣﺎ ﺗﺎﻧﺘﻼﻗﺎﻭﺵ ﺑﺰﺍﻑ . ﻛﺎﻧﻮ ﻣﺤﺘﺎﺭﻣﻴﻨﻲ ﻭ ﻣﺎ ﻋﻤﺮﻫﻮﻡ ﺣﺎﻭﻟﻮ ﺍﻓﺮﺿﻮ ﻋﻠﻴﺎ ﺍﻟﺠﻮ ﺩﻳﺎﻟﻬﻤﻮﻡ . ﻭﺻﻠﺖ ﻟﻠﺪﺍﺭ، ﺑﺪﻟﺖ ﺣﻮﺍﻳﺠﻲ ﻭ ﺟﻤﻌﺖ ﺍﻟﻠﻲ ﺑﻘﻰ ﻭ ﺑﻘﻴﺖ ﻧﺘﺴﻨﻰ ﺍﻣﺘﻰ ﺗﺠﻲ ﻭﺭﺩﺓ . ﺣﺎﻭﻟﺖ ﻣﺎ ﻧﻔﻜﺮﺵ ﺑﺰﺍﻑ ﻭ ﺑﺪﻳﺖ ﻧﻘﺮﺍ ﻓﻮﺍﺣﺪ ﺍﻟﻜﺘﺎﺏ ﺑﻴﻨﻤﺎ ﺗﻮﺻﻞ . ﻣﺮﺓ ﻣﺮﺓ ﻛﺎﻧﺒﻘﻰ ﻧﺘﻤﻨﻈﺮ ﻓﺎﻟﺤﻴﻮﻁ ﻭ ﻓﺎﻟﺴﻘﻒ ﻭ ﻛﻨﺘﺴﺎﺀﻝ ﻭﺍﺵ ﻛﻨﺖ ﻏﺎﻧﻘﺪﺭ ﻧﺪﻭﺯ ﺳﻨﻮﺍﺕ ﻃﻮﻳﻠﺔ ﻫﻨﺎ ﺍﻭ ﻻ ! ﺃﺧﻄﺮ ﻣﺎ ﻳﻤﻜﻦ ﻳﺘﻌﺮﺽ ﻟﻴﻪ ﺍﻻﻧﺴﺎﻥ ﻫﻮ ﺍﻟﺸﻌﻮﺭ ﺑﺎﻟﻤﻠﻞ ﻭ ﺍﻟﻮﺣﺪﺓ ! ﺍﻟﺨﻴﺮﻳﺔ ﻛﺎﻧﺖ ﻋﺎﻃﻴﺎﻧﻲ ﺍﻻﺣﺴﺎﺱ ﺑﺎﻟﺪﻓﺊ ﻭ ﻣﺎ ﻋﻤﺮﻧﻲ ﺗﺸﻜﻴﺖ ﻣﻦ ﺷﻲ ﺣﺎﺟﺔ ﺳﻤﻴﺘﻬﺎ ﺍﻟﻘﻨﻂ ﻭ ﺍﻟﻤﻠﻞ ! ﻛﻨﺎ ﻛﺎﻧﺘﻤﻨﺎﻭ ﻧﻜﺒﺮﻭ ﺩﻏﻴﺎ ﺑﺎﺵ ﻧﺘﺤﺮﺭﻭ ﻭ ﺩﺍﺑﺎ ﻭﻟﻴﺖ ﻣﺸﺘﺎﻗﺔ ﻟﺪﻭﻙ ﻟﻴﺎﻡ !
ﻛﻤﺎ ﺍﻟﻌﺎﺩﺓ ﻭﺭﺩﺓ ﻛﺎﻧﺖ ﻓﺎﻟﻤﻮﻋﺪ . ﻫﺎﺩ ﺍﻟﻤﺮﺓ ﺟﺎﺕ ﻣﺒﺎﺷﺮﺓ ﻟﻠﺪﺍﺭ ﻭ ﺻﻮﻧﺎﺕ . ﻧﺰﻟﺖ ﺣﻠﻴﺖ ﻟﻴﻬﺎ ﺗﺴﺎﻟﻤﻨﺎ ﻭ ﻛﺎﻥ ﺍﻟﺴﺆﺍﻝ ﻋﻠﻰ ﺍﻟﺼﺤﺔ ﻭ ﺍﻟﺤﺎﻟﺔ ﻭ ﺗﺒﻌﺎﺗﻨﻲ ﻟﻠﺒﻴﺖ . ﻣﺎ ﺷﻔﺖ ﻣﻨﻬﺎ ﺣﺘﻰ ﺷﻲ ﺗﺼﺮﻑ ﺍﻟﻠﻲ ﻳﺒﻴﻦ ﺃﻧﻬﺎ ﻣﺎﺣﻤﻼﺵ ﻫﺎﺩ ﺍﻟﺴﻜﻨﻰ . ﻛﺎﺗﺼﺮﻑ ﻋﺎﺩﻱ ﻭ ﺑﻼ ﻣﺎ ﺗﺴﻨﻰ ﻫﺰﺍﺕ ﻭﺍﺣﺪ ﺍﻟﺼﺎﻙ ﻭ ﺗﻜﻠﻔﺖ ﺍﻧﺎ ﺑﺎﻻﺧﺮ . ﻭﺍﺧﺎ ﺍﻟﺼﺎﻙ ﺍﻟﻠﻲ ﺧﺪﺍﺕ ﺛﻘﻞ ﻣﻦ ﺩﻳﺎﻟﻲ ﻛﺎﻧﺖ ﻛﺎﺗﺤﺮﻙ ﺑﻮﺍﺣﺪ ﺍﻟﺮﺷﺎﻗﺔ ﻭ ﺍﻟﺨﻔﺔ ﺑﻘﻴﺖ ﻏﻲ ﻛﺎﻧﺸﻮﻑ . ﺣﻄﻴﻨﺎ ﺍﻟﺒﺎﻛﻄﺎﺝ ﻓﺎﻟﻜﻮﻓﺮ ﻭ ﺷﺪﻳﻨﺎ ﺍﻟﻄﺮﻳﻖ . ﻣﻦ ﺑﻌﺪ ﺷﻲ 25 ﺩﻗﻴﻘﺔ ﻭ ﺻﻠﻨﺎ ﻟﻠﻔﻴﻼ . ﺣﻲ ﺃﻧﻴﻖ ﻭ ﺍﻟﺤﺮﻛﺔ ﻓﻴﻪ ﻗﻠﻴﻠﺔ . ﺣﻼﺕ ﺍﻟﺒﺎﺏ ﻭ ﺗﺒﻌﺘﻬﺎ :
- ﺗﻔﻀﻠﻲ ﻧﺴﺮﻳﻦ ﻣﺮﺣﺒﺎ ﺑﻴﻚ ﻓﺪﺍﺭﻙ ! ﺑﻼ ﻣﺎﺗﺴﺪﻱ ﺍﻟﺒﺎﺏ ! ﻣﺎﺯﺍﻝ ﻏﺎﻧﻬﺒﻂ ﺷﻲ ﻣﺴﺎﺋﻞ ﺩﻳﺎﻟﻲ ﻣﻦ ﺍﻟﻄﻮﻣﻮﻟﻴﻞ !
- ﺭﺑﻲ ﺍﺧﻠﻴﻚ ﺍﺧﺘﻲ ﻭﺭﺩﺓ .
ﻛﺎﻥ ﺧﺎﺻﻨﺎ ﻧﻘﻄﻌﻮ ﻭﺍﺣﺪ ﺍﻟﺒﺎﺳﺎﺝ ﻭﺳﻂ ﺍﻟﺠﺮﺩﺓ ﻋﺎﺩ ﻧﺪﺧﻠﻮ . ﻻﺣﻈﺖ ﻛﻠﺸﻲ ﻣﻨﺴﻖ : ﺷﺠﻴﺮﺍﺕ ﺩﻳﺎﻝ ﻭﺍﺷﻨﻄﻮﻧﻴﺎ ﺑﺠﻨﺎﺏ ﺍﻟﻔﻴﻼ ﻭ ﺍﻧﻮﺍﻉ ﻛﺜﻴﺮﺓ ﻣﻦ ﺍﻟﻨﺒﺎﺕ ﻭ ﺍﻷﺯﻫﺎﺭ ﻣﻐﺮﻭﺳﺔ ﻋﻠﻰ ﻃﻮﻝ ﺍﻟﺒﺎﺳﺎﺝ . ﻭﺍﺣﺪ ﺍﻟﺠﻬﺔ ﻣﻐﺮﻭﺳﺔ ﺑﺎﻟﻜﺎﺯﻭﻥ ﻣﻘﻄﻊ ﺑﺸﻜﻞ ﺍﺣﺘﺮﺍﻓﻲ ﻭ ﻓﻴﻬﺎ ﻃﺒﻠﺔ ﻛﺒﻴﺮﺓ ﻣﺴﺘﻄﻴﻠﺔ ﻭ ﻛﺮﺍﺳﺎ ﻣﻦ ﺍﻟﻘﺼﺐ ﻣﺎﺭﻭﻥ . ﺃﻣﺎ ﻟﺪﺍﺧﻞ ﻭﺍﺧﺎ ﻣﺎ ﻛﺒﻴﺮﺵ ﺑﺰﺍﻑ، ﺗﺤﻔﺔ !! ( ﺗﺼﻮﺭﻭﻩ ﻛﻤﺎ ﺑﻐﻴﺘﻮ )
ﺍﻭﻝ ﻣﺎﺩﺍﺭﺕ ﺑﻌﺪﻣﺎ ﺳﺪﺍﺕ ﺍﻟﺒﺎﺏ، ﺧﺪﻣﺎﺕ ﻣﻮﺳﻴﻘﻰ ﻫﺎﺩﺋﺔ ﺍﻟﻠﻲ ﺯﺍﺩﺕ ﻣﻦ ﺍﻟﺠﻤﺎﻝ ﺩﻳﺎﻝ ﺍﻟﻤﻜﺎﻥ . ﻭﺧﺎ ﺍﻧﺎ ﻣﺎﻣﻮﻟﻔﺎﺵ ﻫﺎﺩ ﺍﻟﻨﻮﻉ ﻣﻦ ﺍﻟﻤﻮﺳﻴﻘﻰ ﻟﻜﻦ ﺣﺴﻴﺖ ﺑﻬﺎ . ﻣﺎ ﻗﺪﺭﺗﺶ ﻧﻬﺰ ﻋﻴﻨﻲ ﻋﻠﻰ ﺍﻟﺪﻳﻜﻮﺭ ﻭ ﺍﻟﻠﻮﺣﺎﺕ ﺍﻟﻠﻲ ﻣﺰﻳﻨﺔ ﺍﻟﺠﺪﺭﺍﻥ . ﻣﺎ ﻓﻴﻘﻨﻲ ﻏﻴﺮ ﺻﻮﺕ ﻭﺭﺩﺓ !
- ﻧﺴﺮﻳﻦ ﺃﺟﻲ ﻧﻮﺭﻳﻚ ﺑﻴﺘﻚ ! ﻧﺘﻤﻨﻰ ﺇﻋﺤﺒﻚ !
ﺣﻼﺕ ﻭﺍﺣﺪ ﺍﻟﺒﺎﺏ ﻭ ﺩﺧﻠﻨﺎ ﻟﻐﺮﻓﺔ ﻣﺎ ﻋﻤﺮﻧﻲ ﺗﺨﻴﻠﺖ ﺗﻜﻮﻥ ﺩﻳﺎﻟﻲ ! ﺍﻟﺤﻴﻮﻁ ﻣﺼﺒﻮﻏﻴﻦ ﺑﺎﻟﻮﺭﺩﻱ ﻭ ﺳﺮﻳﺮ ﻭﺍﺳﻊ ﺟﺎ ﺗﺤﺖ ﺷﺮﺟﻢ ﻛﺒﻴﺮ . ﺍﻟﻔﺮﺍﺵ ﻟﻮﻧﻮ ﻣﻮﻑ . ﺟﻮﺝ ﺍﺑﺎﺟﻮﺭﺍﺕ ﻭﺣﺪﺓ ﻓﻜﻞ ﺟﻨﺐ . ﺍﺭﻣﻮﺍﺭ ﻛﺒﻴﺮ ﻭ ﺑﺎﻳﻦ ﻣﻦ ﺍﻟﻌﻮﺩ ﺍﻟﺮﻓﻴﻊ . ﻛﻮﺍﻓﻮﺯ ﺑﻜﺮﺳﻲ ﻭ ﻋﻠﻴﻬﺎ ﻛﻞ ﻣﺴﺘﻠﺰﻣﺎﺕ ﺍﻟﺘﺠﻤﻴﻞ . ﻃﺒﻠﺔ ﺻﻐﻴﺮﺓ ﻓﻮﻗﻬﺎ ﻣﺸﻤﻮﻡ ﺗﻘﻠﻴﺪﻱ . ﺃﻭﻝ ﻣﺎ ﺗﺪﺧﻞ ﻟﻠﻐﺮﻓﺔ ﻣﺎ ﺗﺴﺨﺎﺵ ﺑﺮﻳﺤﺔ ﺍﻟﺒﺎﺭﻓﺎﻥ ﺍﻟﻠﻲ ﻓﻴﻬﺎ . ﻭﺭﺩﺓ ﻣﺎ ﺩﺍﺭﺗﺶ ﻓﻴﻬﺎ ﺧﺒﻴﺮﺓ ! ﺑﻤﺠﺮﺩ ﻓﺘﺤﺎﺕ ﺍﻟﺒﻴﺖ ﻣﺸﺎﺕ ﻭ ﺧﻼﺗﻨﻲ ﻧﺨﻮﻱ ﺍﻟﺼﻴﻜﺎﻥ ﻭ ﻧﺮﺗﺐ ﺣﻮﺍﻳﺠﻲ ﻭ ﻗﺎﻟﺘﻠﻲ ﺑﻠﻠﻲ ﺍﻟﺪﻭﺵ ﺳﺨﻮﻥ ﺍﻟﻰ ﺣﺘﺎﺣﻴﺖ ﻧﺪﻭﺵ ! ﻣﺎ ﺯﺍﻝ ﻣﺎ ﻣﺴﺘﻌﻮﺑﺎﺵ ﺍﻟﻤﻮﻗﻒ ! ﺍﻟﻮﻗﺖ ﺍﻟﻠﻲ ﺗﺎﻧﻘﻮﻝ ﺻﺎﻓﻲ ﻋﺎﺩﻱ ﺧﺎﺻﻨﻲ ﻧﺤﻴﺪ ﺍﻟﺨﻠﻌﺔ ﻭ ﺍﻟﺮﻫﺒﺔ ﻛﺎﺗﺠﻲ ﺷﻲ ﻣﻔﺎﺟﺄﺓ ﺍﻟﻠﻲ ﻛﺎﺗﺮﺟﻌﻨﻲ ﻟﻨﻘﻄﺔ ﺍﻟﺼﻔﺮ !
ﺑﻌﺪﻣﺎ ﺩﻭﺷﺖ ﻭ ﺍﺭﺗﺎﺣﻴﺖ ﻛﻨﺖ ﻭﺍﺟﺪﺓ ﺑﺎﺵ ﻧﺨﺮﺝ ﺍﻧﺎ ﻭ ﻭﺭﺩﺓ . ﺩﺍﻳﺮﺓ ﻓﺎﻟﺒﺮﻭﻏﺮﺍﻡ ﺑﺎﺵ ﻧﺘﻌﺸﺎﻭ ﺑﺮﺍ . ﻛﻨﺖ ﻣﺮﺗﺎﺑﻜﺔ ﻭ ﺳﻮﻻﺗﻨﻲ ﻋﻼﺵ ﻗﻠﺘﻠﻬﺎ :
- ﺍﻣﻜﻦ ﻋﻨﺪﻙ ﺻﺤﺎﺑﻚ ﻭ ﻛﺎﺗﻠﻘﺎﻱ ﺑﻴﻬﻢ . ﺧﻔﺖ ﻣﺎ ﻧﻜﻮﻧﺶ ﻋﻠﻰ ﺩﺭﺍﻳﺔ ﺑﺎﻷﺟﻮﺍﺀ ﺩﻳﺎﻟﻜﻢ ﻭ ﻧﻮﻟﻲ ﻣﺜﻘﻠﺔ ﻋﻠﻴﻚ . ﻣﻦ ﺍﻷﺣﺴﻦ ﺍﻟﻰ ﻋﻔﺘﻴﻨﻲ !
ﺿﺤﻜﺎﺕ ﻣﺰﻳﺎﻥ ﻭ ﻗﺎﻟﺖ : ﺯﻋﻤﺎ ﻫﺎﺩ ﺻﺤﺎﺑﻲ ﻛﺎﻳﺼﻨﻌﻮ ﺍﻟﺼﻮﺍﺭﺥ ! ﺭﺍﻩ ﻏﻴﺮ ﺍﻟﻜﺪﺍﺏ ﻋﻠﻰ ﺧﻮﻩ ! ﻛﻮﻧﻲ ﻫﺎﻧﻴﺔ ﻣﺎ ﻛﺎﻳﻦ ﺍﻟﻠﻲ ﻳﻘﺮﺏ ﻟﻴﻚ ﻭ ﻧﺰﻳﺪﻙ ﺍﻧﺎ ﻣﺎ ﻋﻨﺪﻱ ﺻﺤﺎﺏ ! ﺩﻭﻙ ﺟﻮﺝ ﺍﻟﻠﻲ ﺷﻔﺘﻲ ﻓﺎﻟﻘﻬﻮﺓ ﻛﺎﻧﻌﺮﻓﻬﻮﻡ ﻣﻦ ﺍﻳﺎﻡ ﺍﻟﺪﺭﺍﺳﺔ . ﻭﺣﺘﻰ ﺍﻟﻰ ﺗﻼﻗﻴﻨﺎ ﺑﺸﻲ ﺣﺪ ﻣﺎ ﻏﻨﻄﻮﻟﺶ ﻣﻌﺎﻩ . ﻣﺎ ﺗﻘﻠﻘﻴﺶ ﺷﻮﻱ ﺑﺸﻮﻱ ﻏﺎﺗﻮﻟﻔﻲ ﺣﻴﺎﺗﻚ ﺍﻟﺠﺪﻳﺪﺓ
ليست هناك تعليقات