قصة بنت الخيرية - الجزء 25
قصة بنت الخيرية
- الجزء 25
ﺍﻟﺴﻬﺮﺓ ﻣﺸﺎﺕ ﺣﺘﻰ ﻟﻨﺺ ﺍﻟﻠﻴﻞ ﻭ ﻛﺎﻧﺖ ﺟﻠﺴﺔ ﻋﺎﺋﻠﻴﺔ ﺑﻤﻌﻨﻰ ﺍﻟﻜﻠﻤﺔ . ﻋﻮﺿﺘﻨﻲ ﻛﻞ ﻣﺎ ﻓﻘﺪﺗﻮ ﻫﺎﺩﻱ ﺳﻨﻴﻦ . ﺑﻌﺪ ﻣﺎ ﻭﺩﻋﻨﺎ ﺍﻟﻀﻴﺎﻑ ﻭ ﻗﺒﻞ ﻣﺎ ﻧﻤﺸﻴﻮ ﻧﻌﺴﻮ،ﻋﻴﻄﺎﺕ ﻟﻴﻨﺎ ﻣﺎﻣﺎ ﺑﺎﺵ ﻧﺘﺠﻤﻌﻮ ﻓﺒﻴﺖ ﻭﺭﺩﺓ ﺍﻟﻠﻲ ﺟﻬﺪﺍﺕ ﻋﻠﻰ ﺭﺍﺳﻬﺎ . ﻻﺣﻈﺖ ﺍﻥ ﺑﺎﺑﺎ ﻭ ﻣﺎﻣﺎ ﻭﺍﺧﺎ ﻣﻔﺎﺭﻗﻴﻦ،ﺑﻘﺎﺕ ﺍﻟﻌﻼﻗﺔ ﺑﻴﻨﻬﻮﻡ ﻣﺒﻨﻴﺔ ﻋﺎﻻﺣﺘﺮﺍﻡ ﻭ ﻣﺎ ﻗﻄﻌﻮﺵ ﺍﻟﺼﻠﺔ ﺑﻴﻨﺎﺗﻬﻢ . ﻳﻤﻜﻦ ﺍﻟﺴﻨﻮﺍﺕ ﺍﻟﻠﻲ ﻋﺎﺷﻮﺍ ﻓﺎﻟﺨﺎﺭﺝ ﺑﺪﻻﺕ ﺑﺰﺍﻑ ﺃﻓﻜﺎﺭﻫﻢ . ﻛﺎﻥ ﺍﺟﺘﻤﺎﻉ ﻋﺎﺋﻠﻲ ﺍﻟﻠﻲ ﻏﺎﺩﻱ ﻳﺪﻳﺮ ﺣﺪ ﻟﻠﻤﺎﺿﻲ ﻭ ﻳﻔﺘﺢ ﺃﻣﺎﻝ ﺟﺪﻳﺪﺓ ﻟﻠﻤﺴﺘﻘﺒﻞ . ﺑﺸﺨﺼﻴﺘﻬﺎ ﺍﻟﻘﻮﻳﺔ ﻭ ﺑﺤﻨﺎﻧﻬﺎ ﻣﺎﻣﺎ ﻛﺎﺛﻴﺮ ﺍﻹﻧﺘﺒﺎﻩ ﺯﻳﺎﺩﺓ ﻋﻠﻰ ﻛﻮﻧﻬﺎ ﺃﻡ . ﺑﺎﻳﻦ ﺃﻥ ﺍﻻﺟﺘﻤﺎﻉ ﻏﺎﻳﻄﻮﻝ ﺣﻴﺚ ﻭﺟﺪﺍﺕ ﻭﺍﺣﺪ ﺍﻟﺒﺮﺍﺩ ﺩﻳﺎﻝ ﺃﺗﺎﻱ ﻭ ﻛﻞ ﻭﺍﺣﺪ ﺧﺪﺍ ﻛﺎﺳﻮ . ﻛﺎﻧﺘﺴﻨﻰ ﺑﻔﺎﺭﻍ ﺍﻟﺼﺒﺮ ﺃﺷﻨﻮ ﻏﺎﺗﻘﻮﻝ ! ﻭ ﻫﻲ ﺗﺒﺪﺍ :
- ﻗﺒﻞ ﻣﺎ ﻧﻌﺎﻭﺩ ﻟﻴﻜﻢ ﺍﻟﺸﻲ ﺍﻟﻠﻲ ﻭﻗﻊ ﺑﺎﻟﻀﺒﻂ، ﻭ ﺍﻟﻠﻪ ﺷﺎﻫﺪ ﻋﻠﻴﺎ، ﻭ ﻫﺎ ﺑﺎﺑﻜﻢ ﺣﺎﺿﺮ ﺑﺎﺵ ﻳﺄﻛﺪ ﻭ ﻟﻰ ﻳﻜﺪﺑﻨﻲ، ﺑﻐﻴﺘﻜﻢ ﺗﺴﻤﻌﻮﻩ ! ﻋﻨﺪﻭ ﺧﺒﺮ ﻛﺎﻧﺘﻤﻨﻰ ﺇﻓﺮﺣﻜﻢ . ﻳﺎﻟﻠﻪ ﻋﺪﻧﺎﻥ ﻗﻮﻝ ﻟﻴﻬﻢ ! ( ﺑﺎﺑﺎ ﺍﺳﻤﻮ ﻋﺪﻧﺎﻥ ﻭ ﻣﺎﻣﺎ ﺳﻤﻴﺘﻬﺎ ﺇﺣﺴﺎﻥ ) .
ﺗﻨﻬﺪ ﺗﻨﻬﻴﺪﺓ ﻭ ﻛﻤﻞ ﻛﺎﺳﻮ ﺑﺎﻟﺰﺭﺑﺔ ﻭ ﻃﻠﺐ ﻭﺍﺣﺪ ﺁﺧﺮ . ﺑﺨﻼﻑ ﻣﺎﻣﺎ ﻛﻴﻬﻀﺮ ﺑﺸﻮﻳﺔ ﻭ ﺻﻮﺗﻮ ﻳﺼﻼﺡ ﻳﻜﻮﻥ ﺷﻲ ﻣﺬﻳﻊ !
- ﺃﻭﻛﻲ ﺳﻤﻌﻮ ﺃﺑﻨﺎﺗﻲ ! ﺍﻟﻨﻬﺎﺭ ﺍﻟﻠﻲ ﻭﺻﻠﻨﻲ ﺧﺒﺮ ﺍﻟﺸﻲ ﺍﻟﻠﻲ ﻭﻗﻊ ﻟﻮﺭﺩﺓ ﻣﺎ ﻧﻌﺴﺖ ﻣﺎ ﺷﻔﺘﻮ . ﺍﺗﺎﺻﻠﺖ ﺑﻤﺎﻣﺎﻙ ﻭ ﻟﻘﻴﺘﻬﺎ ﻓﺤﺎﻟﺔ ﺍﻟﻠﻪ ﺍﻟﻠﻲ ﻋﺎﻟﻢ ﺑﻬﺎ . ﺣﺘﻰ ﻫﻲ ﻛﺎﻧﺖ ﻋﺎﺭﻓﺔ ! ﺍﺗﻔﻘﻨﺎ ﻧﺎﺧﺪﻭ ﺍﻟﻄﻴﺎﺭﺓ ﺑﺠﻮﺝ ﻭ ﻫﻀﺮﻧﺎ ﺑﺰﺍﻑ ﻭ ﻓﺎﻟﻠﺨﺮ ﻗﺘﺎﻧﻌﻨﺎ ﺑﺄﻧﻨﺎ ﺣﻨﺎ ﺍﻟﺴﺒﺐ ﻓﻜﻞ ﻫﺎﺩ ﺍﻟﻤﺂﺳﻲ . ﻛﻨﺎ ﺃﻧﺎﻧﻴﻴﻦ ﻛﻤﺎ ﻗﺎﻟﺖ ﻣﺎﻣﺎﻛﻢ ﻭ ﻛﺎﻥ ﻛﻴﺤﺴﺎﺏ ﻟﻴﻨﺎ ﺍﻥ ﺍﻟﻤﺎﺩﺓ ﻏﺎﺗﻌﻮﺽ ﻟﻮﺭﺩﺓ ﻛﻠﺸﻲ . ﻣﺸﻴﻨﺎ ﻋﻠﻰ ﻭﺩ ﻣﺼﺎﻟﺤﻨﺎ ﻭ ﻫﺮﺑﻨﺎ ﻣﻦ ﺍﻟﻤﺸﺎﻛﻞ ﺍﻟﻌﺎﺋﻠﻴﺔ ﻭ ﺧﻠﻴﻨﺎﻙ ( ﻭ ﺭﺩﺓ ) ﻣﻼﻭﺣﺔ ﻣﻦ ﺩﺍﺭ ﻟﺪﺍﺭ ﺣﺘﻰ ﺗﻮﺧﺮﺗﻲ ﻋﻨﺪ ﺟﺪﺍﺗﻚ . ﻫﻲ ﻣﺮﺍ ﻛﺒﻴﺮﺓ ﻭ ﺻﻌﻴﺐ ﺗﻜﻠﻒ ﺑﺘﺮﺑﻴﺔ ﺑﻨﺖ ﻣﻦ ﺟﻴﻠﻜﻢ . ﺍﻟﻠﻪ ﻳﺨﻠﻒ ﻋﻠﻴﻬﺎ ﻣﺎ ﻗﺼﺮﺍﺗﺶ ﻭ ﻟﻜﻦ ﺍﻟﻮﺍﻟﺪﻳﻦ ﻣﺎ ﻛﺎﻳﺘﻌﻮﺿﻮﺵ ! ﺿﻴﻌﻨﺎﻙ ﻭ ﻧﺘﻲ ﻗﺮﻳﺒﺔ ﻣﻨﺎ ﻭ ﺿﻴﻌﻨﺎ ﻧﺴﺮﻳﻦ ﻭ ﻣﺎ ﻋﺎﺭﻓﻴﻨﺶ ﻭﺍﺵ ﺣﻴﺔ ﻭ ﻟﻰ ﻣﻴﺘﺔ . ﻣﺎ ﻧﻜﺮﻭﺵ ﻣﺴﺆﻭﻟﻴﺘﻨﺎ ﻭ ﻟﻜﻦ ﻣﺎ ﻗﺪﺭ ﺍﻟﻠﻪ ﻓﻌﻞ ! ﺩﺍﺑﺎ ﻧﻄﻮﻳﻮ ﻫﺎﺩ ﺍﻟﺼﻔﺤﺔ ﻭ ﻧﺒﺪﺍﻭ ﺻﻔﺤﺔ ﺟﺪﻳﺪﺓ ﻭ ﺑﺎﺵ ﻧﺒﺸﺮﻛﻢ ﻋﻨﺪﻱ ﻭﺍﺣﺪ ﺍﻟﻄﻠﺐ ! ﺑﻐﻴﺘﻜﻢ ﺗﻮﺍﻓﻘﻮ ﻋﻠﻴﺎ ﺯﻭﺝ ﻟﻤﺎﻣﺎﻛﻢ ! ﻫﻲ ﻣﻮﺍﻓﻘﺔ ﻭ ﻛﺎﻧﺘﺴﻨﺎﻭ ﻣﻮﺍﻓﻘﺘﻜﻢ . ﺁﺵ ﻗﻠﺘﻮ؟
ﻭﺭﺩﺓ ﺳﺒﻘﺎﺗﻨﻲ ﻭ ﺩﺍﺭﺕ ﻓﻴﺎ ﺧﻴﺮ ﻷﻧﻬﺎ ﺯﺍﻋﻤﺔ ﻋﻠﻴﻬﻢ ﻛﺜﺮ ﻣﻨﻲ !
- ﻫﺎﺩﻱ ﻣﺎ ﻣﺤﺘﺠﺎﺵ ﻧﻘﺎﺵ ﻭ ﻛﻮﻥ ﻓﻴﺎ ﻣﺎ ﻳﺴﻮﻕ ﻧﻤﺸﻲ ﺩﺍﺑﺎ ﻧﻔﻴﻖ ﺍﻟﻌﺪﻭﻝ ﻓﻴﻦ ﻣﺎ ﻛﺎﻧﻮﺍ ! ﺇﻳﻪ ﺍﻟﺨﺎﺗﻢ ﻋﻠﻰ ﺣﺴﺎﺑﻨﺎ ﻭ ﺧﺎ ﻳﻜﻮﻥ ﻣﻦ ﺍﻟﻨﺤﺎﺱ !
ليست هناك تعليقات