قصة أربع شباب مغاربة يبحتون عن عمل - الجزء 1 -
قصة أربع شباب مغاربة يبحتون عن عمل
الجزء 1
درت عند عادل شوف اصاحبي ،هاهو أنس جاي....كيبان ليا طالع ليه الدم،ههه جا أنس سلم وهو معصب : صافي أدراري أنا ساخط على لوضعية،وخاصني فلوس ولخدمة والو،الواليد خاصو دوايات،لخوادرية قريب عرسها ومعنديش وزيد عليهم مصاريف الدار..اوه لالا بزاف والله حتى بزاف
كلنا حدرنا راسنا،لاننا كلنا بحال بحال لا أنا لا أنس ولا عادل لا خدمة لا ردمة،نبقاو ندورو ونقلبو حتى نعياو ونجيو نشرو رجلينا،ولكن لي كان كيبقى فيا بزاف هو مصطفى،هو لي قرا فينا وخدا ديبلوم ف علم النفس ولا لفلسفة ماعرفت داكشي شنو سميتو...قرا حتى حماق ومالقا خدمة،،غير أنا ودراري ايلا دبرنا على شي بريكول راه كنعيطو ليه تاهو يدبر على راسو...واخا كان كيتسطى علينا وكيسطينا معاه ههههه بالسيف هاد الوضعية ليحنا فيها راه كنبغيو نطرطقو كل نهار
شاف فيا أنس،هز راسو قاليا غير بعينيه شوف لجيهة لباب ديال لقهوة صطوف الفيلسوف جاي
هزيت راسي،وحيدت الغمة،ودرنا كلنا واحد الضحكة
جا مصطفى ڭلس،حط شي ملف فايديه لاحو لينا على الطبلة وشد فراسو،حسينا بيه بغا يبكي،يالاه بغيت نهدر قالي : رشيد خويا الله يحفضك ماتسولونيش راه كلشي باين،ماكاينة خدمة...وليوم ماقادرش ندخل لدار ولي فيا يكفيني
حدرت راسي،وكلنا مهدرناش وماقلنا حتى كلمة،كلنا كيجمعنا نفس الهم..ماعندنا خدمة وواليدينا ودارنا معولين علينا،ضربت على الطبلة : الدراري واش كل نهار غنبقاو هاكا،اجيو نديرو شي بيعة وشرية
عادل هز كاسو ديال القهوة ودار واحد التعبير ديال :" هادا اش كيخربق"
كنهدر بحماس : الدراري نتوكلو على الله نتجمعو ونديرو شي لعيبة لي كان،حتى أنا بحالي بحالكم،نفس الظروف...
جاوبني أنس : يالاه هاحنا معاك ،اشناهي هاد البيعة وشرية لي باغي دير،وفيناهو راس المال ...وايلا ماصدقش هاد لبلان؟ غنصدقو خاصرين وبالضوبل..صديقي شوف حنا ماعندناش كينديرو..
خنزرت ف أنس : مالك متشائم،وغديرو النية ماتعرفو..
هز مصطفى راسو : يالاه ڭول اش نديرو..
دوزت ايدي على شعري : والصراحة ،تلاقيت هادي يومين مع واحد السيد خدام فلمارشي ديال الخضرة وقال ليا يتعاون معانا،نديرو كروسات وونبيعو لخضرة ..
ماجيت نكمل هدرتي حتى تهزات الطبلة وتحطات بالضحك،كلشي ڭلس كيضحك،وحتى دازو ليهم الدموع ڭاع!
مصطفى حيد نضاضرو وبدا كيمسح فالدموع ديال الضحك : والله أصاحبي لقتلتينا بالضحك ههه...أرا يديك مديت ليه ايدي ،ضرب عليها وقاليا : ههه والله لكنت مغبون ومهموم ودابا فاش ضحكت تفاجات عليا ،الله يعطيك الصحة!
حدرت راسي،ومحملتش...كلشي كيضحك،،ومارضيتش واخا هوما صحابي وعشراني ولكن ...هآآ بديت كنضحك وبديت بغيت نتلفهم على هاد المشروع ولكن هوما بقاو كيضحكو بيه!
جا وقف علينا واحد السيد وتاهو كيضحك،كلنا هزينا فيه ريوسنا..
السلام ،ممكن نهدر معاكم الشباب؟
جاوبو أنس : مرحبا الشاف ريّح!
شاف فيا وبدا كيضحك : كروسة لخضرة! من نيتك زعما! ههه الدراري بغيتو لخدمة تبعوني نهدرو على برا، وايلا كنت موافقين على لخدمة الله يسخر!
دراري تحلو ليهم لعينين سمعو لخدمة وكلهم جاوبو : اه الله ياودي حنا كنقلبو عليها واخة حنا معاك..
مشا سبقنا،وأنا خاطري مامهنينيش،وايلي حنا شبنا باش نخدمو و والو،،قلت لدراري : هاد السيد مشكوك فيه ماديروش التيقة،شي حالتو دايرة بحال شي بزناس،باينة لقضية فيها لحشيش!
دفعني عادل : شفتي راه ماكاين لبزناز قدك،باغي دير كروسة تبيع لخضرة ..باش غدا يجيو لبوليس يلوحوك نتا وياها!
مشاو سبقوني،لبست جاكيطة ديالي وتبعتهم!
وقفنا بعاد على الناس...كنطلع فيه وكنزل وماعرفت اش هاد لخدمة لي جايب لينا هاد خينة...ومنكدبش،حتى أنا كنت باغي نعرف هاد لخدمة وايلا كانت تجيب لمصاريف ديال الدار علاش لا....
يتبع ..... .
ليست هناك تعليقات