قصة كريم فالمدينة - الجزء 10

الجزء 10

ملاك بغات تشرح لأمال و لكن ماخلاتهاش و صرفقات كريم و مشات بحالها ، كريم شرح لمروان و قاليه بللي راها بحال ختو ، و نقزات ملاك قالت لكريم و مالو هو فهاد البلان ، و هو يقولها مروان حيت كانبغيك ، قالت ليه أنا لا و ماكنفكر ندير تا شي علاقة دبا ، تصدم و مشا فحالو 

فالليل فاش كريم مشا ينعس فالفندق و جا يخلصهم بحال ديما ، لقى الفلوس كاملين اللي كانو عندو تقاداو وداك شوية اللي بقى ليه ميكفيهش يخلص الليلة ، و عيا مايطلب فيهم يخلوه يبات غير هاد الليلة و الغد ليه يمشي يدبر على راسو ، و هما والو قالوليه إلا ماخلستيش بلاما تحلم تبات هنا 

خرج للزنقة بالليل و الشتا كاطيح و ما زعمش يمشي عند خالتو تاني ، و خصوصاً أنه تا امال كاعية عليه ، الحل الوحيد اللي بقى ليه هو مروان واخا دارهم بعيدة و تا هو كاعي عليه ، مشا فديك الشتا و غادي ، تا وقفو عليه وحدين قالوا ليه حط دكشي لي عندك ، و تفكر بللي إلا بداو تيقلبو فيه غايلقاو البزطام فالجيب و فيه لا كارط ديالو اللي بلا بيها ميقدرش يعاود يدخل للمعهد ، و هو يهرب ، هو تيجري و هوما تابعينو ، هو عيا و هوما باقين تيجريو ، جاب الله تخبا لهم فواحد الجردة ما شافوهش 

دارو فيه خير ، لقى راسو قرب بزاف لدار مروان ، فاش وصل و صونا حل ليه مروان نيت ، قاليه باقي عندك الوجه جاي عندي تال الدار ، و هو ينقز باه قاليه '' شكون تما ا مروان ، آه كريم دخل دخل ا ولدي '' مروان مشا لبيتو و كريم مشا ريح مع باه لقاه شاد ماتش د ارسنال تاني ، و بقى تايبلي فيه ، و كريم تا هو عجبو الحال 

من مور ما سالة الماتش كريم عاود ليه على البلان د الفندق و ماعندو فين يبات هاد اليامات ، قاليه :

- مرحبا بيك ا ولدي على الراس و العين

- شكراً ا عمي

- غير بغيت نسولك واحد السؤال 

- معلوم قوول

- واش مروان مخاصم معاك

- اه را عقع لينا واحد سوء تفاهم الصباح فالمعهد

- و شوف ا ولدي ، غير طلب منو السماحة و هو قلبو بيض دغية تقنعو

مشا كريم عندو لبيتو ، مبغاش يشوف فيه ، مشا ريح حداه و بقى تيعاود ليه البلان كامل و قنعو ، و بقاو تيضحكو ، و قاليه ملاك أتولي تبغيك إن شاء الله و غير بالحيلة . مروان عطاه يحل الفيسبوك ديالو و لقى امال مكونكتية .

يتبع...