Header Ads

قصة كمال و هناء - الجزء 10


قصة كمال و هناء
الجزء 10


كمال:عمرك تجبدي عليا البار وداك شي لي فات،حنا ولاد اليوم البارح نسايه عليك، نتي عشتي حياة بدون أب ولا أم وأي وحدة في بلاصتك يمكن دير بحالك ولا كثر منك.
هناء:كمال الله يخليك ليا وعفاك بغيتك عمرك تسمح فيا واخا معرفت شنوو يطرى تواعدني ؟؟
كمال:انا كنواعدك هنااااء.
هناء:كمال انت دابا هو عائلتي فيك كولشي منقدرش نعيش بلا بيك طرا ليك شي حاجة غادي نحماق والله.
كمال:ماغادي يطرى والو انشاء الله غادي نتزوجو ونرجعو نسكنوو فالدار لي فالعروبية.
هناء:اويلي على العروبية هاديك راه افغنستان، رجعتي تاني لعادتك القديمة بغيتي تفقصني !!
كمال: غير كنضحك معاك الشنيولة ديالي ههههه
رجع حمزة لقا هناء و كمال كيضحكو وفرحانين وناشطين وفرح ليهم وقال.
حمزة:هاي هاي على العشق و الغرام ههه
هناء حشمات و حدرات راسها و كمال بقى كيضحك و قال.
كمال:خويا حمزة بارك لينا صافي تفاهمنا انا و هناء وانشاء الله غادي تكون مراتي.
حمزة:والله حتى فرحت ليكم مبروك عليك اخويا كمال و حتى نتي اختي هناء مبرووك.
هناء:الله يبارك فيك خويا حمزة عمرني نسا خيرك انا وكمال.
حمزة:صافي باركا من الشكر وزيدو قدامي نديكم لواحد البوتيكة ديال الحويج تقداو لي عجبكم كلشي على حسابي.
كمال:لا لا خويا حمزة حشومة نزيدو نتعداو عليك.
حمزة:سكت وزيد قدامي انت راك خويا صغير وزايدون انا كنهضر مع هناء الكادو ديال العرس هادا غادي نسبقوو ليكم هههه
هناء:صافي خويا حمزة ملي الكادو هادا ديال العرس حشومة نرضوه في وجهك هههههه
داهم حمزة لواحد البوتيك واعرة فيها الحوايج ديال النساء ورجال خداو داك شي لي خاصهم وحتى حمزة خدا حوايج جداد و خلص حمزة حلف واش يخلي كمال يعطيه شي حاجة و ركبو فالطموبيل و رجعو الدار طلعات هناء و كمال و حمزة قال.
حمزة:طلعو انا تابعكم نهضر مع العربي.

كمال:خود راحتك خويا حمزة انا نوجد شي حاجة ناكلوها.
حمزة وصل عند العربي و سلم على الرجال لي جاب و قال.
حمزة:العربي كاين شي جاديد ؟
العربي:كون هاني سي حمزة كولشي هو هاداك غير نعس على جنب الراحة.
حمزة:هاكا نبيغك حل عينيك مزيان وصي دراري و تهلا فيهم خلصهم مزيان حتى نتحاسبو انا وياك.
العربي:صافي سي حمزة كون هاني.
طلع حمزة ولقا كمال فالكوزينة وقال.
حمزة:كمال خاصك تعلم هناء هههه
كمال:وايييه قالت ليك مكتعرف والوو غادي نوحل معاها.
حمزة:فين مشات بعدا ؟
راه كتقياس داك شي لي جابت.
حمزة:ههه خليها بصحتها البنات هما هادوك عزيز عليهم الباس و المراية خاصها نهار غير قدامها هههه،انا غادي نطلع الفووق تال من بعد ونهبط خودو راحتكم انا ماقاد على والوو شبعان من الغدا.
شوية جات هناء لقات كمال بوحدو وقالت.
هناء:المسخوط ياك ما نعاونك فشي حاجة ؟
كمال دار عند هناء و شاف فيها وقال.
كمال:هاي هاي هاي هناء جيتي واعرة والله اش هاد الزين كامل لي عطاني الله.
هناء بدات كاضحك وقالت ليه.
هناء:كمال ماتزيدش فيه غير شويا وصافي ههههه
كمال:اويلي على شويا هاد شي كامل و شوية كون كان بزاف يعلم الله شنو غادي ندير ههههه
هناء:المسخوط شنو غادي دير جمع راسك شويا راك بنتي ليا دختي وخرج ليك العقل هاد النهار
كمال:هناء وشكون من غيرك لي خرج ليا العقل،ولكن صراحة جيتي غزالة والله بصحتك حياتي.
هناء:كمال راه البراد لي حاط فوق البوطة كشكوشتو خرجات والبوطة كاملة عمرات.
كماب:ناري اشنيولة بقيت مقابلك حتى اتاي تكب فوق البوطة ههه
هناء:ايوى الحداgة لي فيك هي لي دارتها ليك هههه
خرجات هناء من الكوزينة ومشات لصالون شعلات tv ولقات الاخبار بقات تفرج شويا حتى قالو بلي البوليس لقاو واحد الطموبيل فواحد الواد فالخرجة ديال مدينة مراكش وفيها

واحد الراجل مقتول شي واحد قتلو ودارو فالكوفر وراو واحد صورة ديالو وهناء غير شافت الصورة تخلعات.
هناء:كمال..كمال جري جري اجي تشووف !!
كمال:مالك هناء شنو كاين شوف دغيا شووف صورت من هاديك ؟
كمال غير شاف الصورة وقال.
كمال:هناء سفيان هادا مالو شنوو كاين ؟
هناء:الشرطة لقات واحد الطموبيل مشفورة و فيها سفيان مقتول!
كمال:اش كتقولي هناء.
هناء:والله حتى هاد شي لي قالو فالاخبار دابا.
كمال:اوااه مايمكنش سفيان مات قتلوه ولاد الحرام صافي عرفونا فين كاينين !!
هناء تخلعات وبدات تبكي وتلوم زهرها العوج وكمال كيقول ليها صافي هناء غير صبري ماغاديش يطيحو علينا هنا.
هناء:غير الله يستر وصافي اما هاد شي بزاف انا صافي عييت.
حمزة سمع هناء كتبكي وهبط كايجري وقال.
حمزة:كمال شنو كاين ياك ما تاني تخصمتو ؟
هناء:لا اخويا راه سفيان مول الطاكسي لي جابنا هنا البارح بالليل مات تعرفنا عليه ملي دوزوه فالاخبار دابا،قتلوه ولاد الحرام وداروه فواحد الطموبيل ولاحوه فالواد.
حمزة:هاد شي ولا كيخلع او حتى مول الطاكسي قتلووه !!
كمال:شنو غادي نديرو دابا ؟
حمزة:غادي تبقاو هنا وغادي نتصرف انا كونو هانيين حتى واحد ما غادي يحط يدو عليكم.
ديك ساعة مختار و احمد كيوجدو الخطة باش يدخلو لديك الدار باش ينفدو الجريمة وهي قتل هناء وكمال حتى هو وأي واحد عتارض طريق ديالهم غادي يكوون المصير ديالو بحال سفيان.
فديك ساعة العساس لي ف الفيلاج مشى علم السلطات و قال ليهم بلي كايعرف سفيان والطموبيل لي جبدو من الواد تشفرات من الفيلاج لي كايعس فيه وعاود ليهم بلي واحد السيد جا لعندو وقال ليه بلي هو محقق و تابعين شي مجريمين ومشاو مع سفيان مول الطاكسي لي مات.
المحقق نور دين عرف بلي المجرم لي قتل سفيان هو لي لي شفر الطموبيل من الفيلاج.

فالوقت لي كان نوردين كايبحت فالسيارة هو والمحقيقين لقاو واحد الخاتم ديال الفضة فيه واحد الجمجمة, هذاك الخاتم كان ديال أحمد هادشي لي مانتابهش ليه احمد نهار هزو الجثة ديال سفيان هو ومختار بغاو يديروها فالكوفر ديال الطموبيل تنصل ليه الخاتم من صبعو بلا مايحس.
داك الخاتم هو لي غادي يسهل المؤمورية شوية على الشرطة حيت وخصوصا ملي العساس لي شفرة ليه الطموبيل من الفيلاج شاف سفيان و الطموبيل المشفورة مشى عند البوليس و عود ليهم شنو وقع فديك الليلة و قاليهم بلي الراجل لي جا عندو ديك الليلة وقاليه انا محقق وسولو على واحد البنت وولد كان هزهم سفيان مول الطاكسي الله يرحمو ،ف هاديك الوقت نيت فاش تشفرات الطموبيل و داك الراجل لي قالي بلي هو مححق كان داير واحد الخاتم في صبعو فيه واحد الجمجمة و هي لي لقا نوردين فالطموبيل ووراها العساس و تعرف على الخاتم وبدات مرحلة البحت على احمد لي العساس عطى البوليس الموصفات ديالوو و حاصرات الشرطة المدينة من كل الجهات باش يشدو احمد لا كان مزال داخل المدينة.
فالدار ديال حمزة كمال وهناء مزال متوترين بسباب داكشي لي سمعو فالتلفزة.
كمال:هناء ناريي نسيت !! 
هناء:مالك ياك لاباس اش نسيتي؟ 
كمال: ختي كريمة نسيتها !
خاصني نتاصل بيها تاني حيت من بعد هادشي لي وقع لسفيان خاصنا أي حاجة نتوقعوها من دوك المجريمين ولاد الحرام . 
كمال بدا تيصوني على كريمة ولكن كيف العادة مكاين والو.
هناء: صوني على بنت خالتك وسولها عليها.
كمال:هناء أول مرة تقولي شي حاجة زوينة فحياتك،ياربي معرفتش كيفاش مشات لي من بالي هاد الفكرة.
هبط حمزة من الفوق ولقا كمال وهناء مصدومين وعودو ليه شنو طرا وتخلع.
كمال بدا تيصوني على بنت خالتو وجوباتوو وبدا كيتفتف!
شوية كمال طاح ليه تليفون من إديه و هناء تخلعات !!

سولاتو هناء
هناء:كمال مالك ؟ كمال:تايشوفيها بنضرات كيعبرو على الخوف والتوتر وعنيه مغرغرين.
أخيرا كمال نطق.. ك ك كريمة مكيناش عند بنت خالتي.
الدنيا دارت ب هناء معرفات باش تبلات كتلوم فراسها فكل مرة كتشوف كمال غادي يحماق على المصير المجهول ديال ختو.
واحد اللحظة هناء قالت ليه.
هناء:كمال سمح ليا بزاف أنا السباب فهادشي لي واقع لهاد الناس كاملين فالاول سفيان وادبا خت...قاطعها كمال قبل ما تكمل سميت ختو
كمال: ششش وعنيه كلها دموع إلا مسو شعرة وحدة من ختي ولا منك غادي نمسحهم من الارض ودابا سكتي عافاك. كمال مبقاش قال لهناء شنيولة كيف موالف سالا وقت الضحك دابا هدشي مبقاش فيه اللعب الموت هادي عصابة كتحصد ف ارواح الناس العزاز على كمال و هناء.

هناء:حدرت راسها وبقات ساكتا.
حمزة ماعرف ميقول غير تعصب بزاف ملي شاف صحابو فديك الحالة مشا خرج وضرب الباب عايط على العربي وقاليه
حمزة:واش بانت ليك شي حاجة فشكل هنا؟! العربي:كفاش فشكل اسي حمزة؟
هنا مكاين والو والبيع غادي مزيان.
حمزة :لا زعما مدخلش شي واحد غريب لدريبة هاد لايام،شي براني؟ العربي :اه جاو واحد جوج رجال لابسين لكحل وشراو داكشي لي علا بالك وغبرو.
حمزة: قلتي جوج؟
اجي اجي معايا.
دخل العربي مع حمزة ل الدار وعيط على هناء وكمال وقال. 
حمزة:العربي وصف لينا دوك جوج رجال لي جاو عندك وقلتي بلي برانيين. بقا العربي تيوصف وكمال تحششو عليه ركابيه وقال.
كمال:هادو راه المواصفات ديال دوك جوج لي شفنا فالعروبية شاف فهناء وقاليها هما هادو!
هناء تلفات وبدات تتبكي عنقها كمال ﻷول مرة وقالها متخافيش انا معاك أ هناء سمحي ليا قبيلة تعصبت عليك.
هناء:عارفاك خايف على ختك و عليا وهادشي بزاف أكمال أنا خايفة والله. حمزة : معندكوم مناش تخافو محدي هنا وختك غادي نلقاوها.
هبط العربي وراد البال مزيان هو ودوك الرجال لي معاه و عاود ل سعيد اش كاين حيت هادوك جوج ف أي لحظة يرجعو حيت مجريمين قباح.
مختار و احمد تزيرات عليهم القضية وبالخصوص ملي شافو التلفزة وعرفو بلي لقاو الجثة ديال سفيان والطموبيل تجبدات من الواد والعساس ولا مول الطموبيل بدون شك غادي يكون شافها و مشى عند البوليس.
احمد:صاحبي أش غنديرو دابا.
مختار :مالك كترعد عليا هنا بحال شي دجاجة! ياودي ياودي خلعوك البوليس ولا شنو.
أحمد :خصنا نسربيو نقتلو دوك جوج راه ونغبرو انا راه وجهي شافو العساس وانت لا انا لي فالخطر دابا!
مختار:ماتخافش اجي غادي مشيو الغابة نتخزنو فيها حتى تبرد القاضية شوية ونخرجو باليل حيت دابا لابقينا هنا غادي يتعرفو عليك البوليس.

مختار واحمد غادين فالطريق ورادين البال حتى وصلو لواحد الغابة دخلو ليها ومختار قال.
مختار:احمد انت صاحبي ودوزتي معايا هاد الايام شحال من واحد صفينها ليه واخر واحد هو مول الطاكسي وتعلمتي مني الحرفة ولكن ما عند جد بوك الزهر حيت اليوم هو الاخير ليك فهاد الدنيا غادي نصفيها دابا.
احمد:اش كتقوول اخويا انا شنو درت هادي هيا الصحبة ! 
مختار:انت دابا خاصك تموت حيت غادي نمشيو فيها بي سبابك باين البوليس غادي يطيحو عليك و غادي تفرشني معاك حتى انا.
احمد بغى يهرب عرف مختار صافي عينيه خرجوو ومتعطش القتل ولا قال شي حاجة كايديرها.
احمد هرب ومخلوووع و مختار تابعو، حتى احمد عيا ووقف وجبد الموس ديالو وبغى يدافع على راسوو دار يشووف مختار واش وصل ليه ولكن تفاجئ حيت ما لقا حتى واحد وراه مختار غبر وبدا احمد كيقوول.
احمد:مختار خرج انا كنتسنى فيك نتقاتلو دراع بلا ماس بلا حتى حاجة.
شوية مختار و هو يخرج من جنب واحد الشجرة كان مخبي وراها و بدا كيضحك وقاليه.
مختار:ههه حتى انت الكلب تحل ليك الفم ووليتي تقول ليا نضاربو دراع.
احمد:لوح الجنوي ديالك وحتى انا و نضاربو دراع لا كنتي راجل.
مختار:ها هو لحتو واجي دابا لهنا نوري لمك.
احمد:انا لي غادي نواري لمك ها الجنوي حتى انا لحتو.
احمد غادي عند مختار بغى يضربو بيدو و هو يخوي على ديك الضربو و هو يجبد واحد الموس صغير كان خازنو حتياط وهو يعطيه حتى احمد غوت و طاح الارض و دم كايخرج بغزارة وهبط مختار شدو من شعرو وهز ليه راسو وقال ليه.
مختار:عمرك تعلم المكلخ وعمرك دير التيقة فشي واحد مجرم وقتال و غدار بحالنا ولكن دوماج فات الفووت باي اعشيري.
احمد:مختار عفاك متقتلنيش عتقني بغيت نعيش!
مختار:انا غادي نعتقك دابا ونخليك ترتاح اديوس المكلخ.
مختار عاود ضرب احمد حتى ودع الدنيا.

مختار ملي كان خارج من الغابة تلقى مع واحد الدورية ديال الشرطة ماحس بيهم حتى وقفو عليه كان بغا يهرب و لكن فات الفوت وخاف يشكوو فيه ولاح الموس باش قتل احمد بسرعة باش مايلقاوهش عندو.
قالو ليه ارا البطاقة ديالك مختار مكانتش عندو حيت مجرم وقتال ميمكنش يهزها معاه،ولقاو عليه القبض وداوه لمركز الامن الوطني ،مختار ديك ساعة عرف راسو مشى فيها ولكن تبت راسوو باش مايبينش راسو بلي خايف ويعرفووه البوليس داير شي حاجة.
ملي وصلو لمركز الامن الوطني جاهم اتصال على ود الجثة لي بانت فالغابة(الجثة ديال احمد).
المحقق نوردين جاتو معلومات بلي واحد الشخص كان كايدير الرياضة فالغابة و لقا الجثة و علم الامن.
المحقيقين شكو في مختار حيت ديك ساعة لقاوه قريب من المكان فين بانت الجثة وبقاو كيسولو فيه.
اش كانتي كادير تما وهو قاليهم بلي غير كايدور ويستنشق الهواء.
وحيت المواصفات لي عطاهم العساس على احمد منطابقة مع الضحية المحقق نور دين شافو وقلب ليه الاصابع ديالو ولقا الاثر ديال الخاتم فين كان وتاصل بالعساس جا شاف الضحية في مستودع الامواتت وتعرف عليه فالبلاصة.
الموت ديال أحمد سهل كلشي على البوليس الشيء لي مختار مكانش ضارب ليه الحساب ومبغاش يعتارف حتى بانت ادات القتل باش مختار قتل احمد و لقاو بلي البصمات لي كانت على الموس هيا ديال مختار وقاليه نوردين ملي كان كايدير معاه التحقيق فواحد الغرفة فيها طبلة و جوج كراسة و بولة ضوء ديالها خفيف.
نوردين:شوف اسي راه ماعندك ما تخبي مزال علينا كولشي بان انت لي قتلتي احمد و سفيان مول الطاكسي ياك، لقينا البصمات ديالك على ادات الجريمة باش قتلتي احمد فالغابة بغيتي تسكتو بمرة حيت عرفتي بلي حنا كنا قراب نوصلو ليه.
مختار:صافي غادي نعتارف ليكم اه انا لي قتلتوو و قتلت سفيان انا واحمد.

مختار عتارف بالجرائم ديالو وعاود كولشي ل نوردين وقال
نوردين:علاش بغيتو اصلا نتوما تقتلو هاد هناء؟
مختار:انا ماعرفتش علاش مهم حنا مخلصين باش نقتلوها وصافي ونهار الاول كانت عملية بسيطة كلفنا بيها واحد يالاه بدا معنا،كانت اول عملية ليه حيت قلنا بلي بنت بحدها باش تقتلها وهي خارجة من خدمتها بالليل وبحدها اتكون ساهلة ولكن صدقات هاد العملية لي حgرناها هي الصعيبة وهي لي فرتكات لينا الشمل وصلاتنا لهاد الحالة لي حنا فيها.
نوردين:البنت شنو طرا ليها؟
مختار:هناء هربات عتقها واحد الشاب تكون في عمرو ديك 28 سنة هرب معاها لواحد الدار فالعروبية وتبعناهم حيت ختاطفنا ختو وشبعنا فيها عصا حتى عتارفت لينا بلي هما فواحد الدار فالعروبية.
نوردين:وهداك لي كنتو صايفتوه ليها النهار الاول باش يقتلها شنو طرا ليه؟
مختار:عطيني بعدا شي كاس ديال الما بغيت نشرب.
نوردين:واخا تسنا انا نقوليهم يعطيوك تشرب.
جابو ليه شرب وشكر نوردين وبدا مختار يكمل ليه القصة.
نوردين:نكملو دابا .
مختار:مهم حنا كنا مراقبين بدر لي كانت اول عملية ليه وكان غادي يقتل البنت ولكن داك الشاب جا وعاونها وكانت الصدمة انا بدر ضرباتو البنت وطاح الارض وهما هربو تبعهم الجاسوس ديالنا شافهم فين دخلو بلا مايحسو بيه ولاح ليهم واحد الورقة تحت الباب فيها تهديد،وتصل بينا وقالينا الشاف جيبو الجثة غبروها ومن بعد سيرو الدار وقتلوهم ب 2.
نوردين:هاد دشي كامل درتوه على قبل بنت تقتلوها يعني كاين شي لغز في هاد القضية.
مختار:انا كندير خدمتي وحتى لهنا معارف والو شكوون لي بغا يقتل البنت حنى كانفدو الاوامر ونتخلصو صافي.
نوردين:اوكي شكرا على التعاون ديالك معنا،اخر سؤال عندك شي معلومات فين نلقا هاد البنت وشاب لي معها؟
مختار:اه عارف !

يتبع..

ليست هناك تعليقات