قصة أربع شباب مغاربة يبحتون عن عمل - الجزء 9 -
قصة أربع شباب مغاربة يبحتون عن عمل
الجزء 9
تشعلو ضواو فالڤيلا وسمعنا صوت ديال صفارة الانذار خدام،،جا مصطفى كيجري : ناري الدراري يالاه نهربو راه عاقو بينا،،يالاه بغيت نخرج ايديا وهو تبان ليا شي حاجة كتبري،لقيتها لقيتها،جبدت الديامند ورجعت لغطا ديال لاساش كيفما كانت درتها فجيبي وخرجنا كنجريو،،هربنا شديناها بجرية حتى للدار ديال نسرين! حلات لينا،قلت ليها لقيناها والله! دخلنا وڭلسنا فالصالون،بغيت نعطيها ليها وهو يقول ليها عادل : عطينا فلوسنا هو لول،قلتي لينا نعطيكم فلوسكوم فالبلاصة! بدات كتضحك: ماقلتي عيب ولكن نشوف الديامند بعينيا لاتكونو جبتو هاديك لي مزورة وخبيتو عندكم لحقيقية! معجباتنيش هاد الهدرة،حسبت نسرين كتيق فينا...وكتيق فيا،لانها كانت متقربة ليا ! عطيتها ليها شافتها،قالت لينا هادي هي هانا جاية! مشات جابت بليزة ديال لفلوس،عطاتها لينا،بتنا ديك ليلة كنحسبو لفلوس! قالت لينا: اجي خديتو لفلوس معند امين ياك؟ قال ليها مصطفى معلوم خديناهم،ولكن ماكتسوا والو قدام هاد لفلوس،دار عندنا: مسكين خلينا الدنيا مرونة عندو ههه يسحاب ليه داخلين نسرقو ليه الديامند ! كلنا بدينا كنضحكو،،ورجعنا وحنا ناشطين،كل واحد كيحلم فينا بالمستقبل..وهاد لمرة مستقبل زوين دازت يوماين وأنا مامتيقش راسي فراس مالي 21 مليون ونص فظرف 3 ايام هه ..ڭلست مع راسي نفكر شنو ندير بهاد الرزيق لي جاب ليا الله،شديت ورقة وستيلو وكتبت ڭاع لي خاصني وخاص الدار وشاط لخير! تفكرت لكتاب ديال نسرين،جبدتو تلاحيت فوق السداري وبديت كنقرا...هادشي بحال مذكرات .. " اسمي نسرين تزاديت ف 1986 فشهر 5 نهار 26،حرمني الله من الثروة كنت عايشة فقيرة الفقر المدقع،ولكن انعم عليا بجمال،وبعقل ...كنت كنصور فلوس للدار غير بنصب على عباد الله،حتى عييت وخاصة فاش لقيت راسي زدت فيه،فاش ولات عندي 25 عام،قررت نتزوج ولكن ماشي باي كان،،اتعملت جميع الوسائل باش نوصل للطبقة الراقية،نحط نرجلي على ارض الاثرياء وتوفقت...بان ليا امين،الرجل الثري لي كيهتم بالمظاهر واي حاجة جميلة كاتاخد انفاسو..وحب امتلاك الغير..خديت جميع المخاطر ووصلت ليه،غريتو بجمالي وتحايلت عليه باسم الحب حتى تزوجني..صبرت للكلخ ديالو،وتاهبلانيت لي كنت كنجيب عليه،واخة مكنتش كنحمل نبقا بريئة 24/24 !ولكن هو كلما شاف وحدة كتبري كيتبعها،،وبدا كيتتبدل عليا،قهرني وبدا كيهددني بلي غيرجعني كفس ماكنت،بدا عقلي كيفكر..وعرفت بلي غيجي نهار غنخرج من هاد القصر باقصى الخسائر..فكرت ف فكرة اكبر مني،وقررت ناخد منو نصف الثروة ديالو غير بالفن
... يتبع
ليست هناك تعليقات