قصة كريم فالمدينة - الجزء 17
الجزء 17
هبط الليل
الرجل رجع للسبيطار و بقا جالس حداها كثر من ساعة د الماغانا و والو ما فاقتش ، و قال للطبيب '' هاك النمرة و فاش تفيق عيط لي الله يجازيك بخير '' ، و فاش كان خارج بانليه الطبيب كيهضر مع واحد الفرملية على امال ، قاليها '' هاهيا هاد الإبرة ديال النعاس غنحطها فالمجر ديالها ، ماتعرفي يتزاد عليها الحال وانا ماكاينش عطيوها لها
و من بعد ما مشا كريم عند المخرج باش يقوليه على أمال رد عليه '' دابا الليل ماعندنا مانديرو ، خلي تال الصباح إن شاء الله ، نتفرقو و نقلبو عليها جميع ''
صبح الصباح
امال بدات كتحل عينيها ، الطبيب عيط للرجل ، و فاش جا شافها و بدا تيحاول يهضر معاها ، بانتليه ما عاقلة على والو ، الرجل جاتو فكرة أنه يربيها على أساس بنتو خصوصاً و أنها فقدات الذاكرة ، و قال للطبيب را غانديها معايا للدار ، الطبيب قليه '' راه من المستحيل ، هي باقا عيانة وخاصها مازال تبقى معانا هنا
اللخرين فاقو الصباح و تفرقو باش يقلبو ، كل واحد فين مشا ، و كريم ما جا غير فداك السبيطار اللي ناعسة فيه امال ، داك الرجل ماسمعش للهدرة لي قاليه الطبيب و تسناه حتى خرج و هو يشد ديك الإبرة اللي فالمجر دغها لامال باش تنعس و هزها
كريم مع وصل لتما سول ديك فالإستقبال قالها واش ماعندكومش واحد البنت هنا سميتها أمال السعيدي ، بدات كاتقلب و قالت ليه لا أ سيدي ، و هو يبان ليها داك الرجل هاز امال ، و كريم تيشوفيها و عاطيهوم بالضهر ، قالتليه أ فين غادي بالسيدة أ الشريف و كريم مع مركز غير على امال ما ضارش يشوف شكون و هو ما عارفش أن ديك الدورة هي اللي عليها كولشي
قاليها را غير غانديها تجلس فالجردة وتشم الهوا شوية ، خرج الرجل و ديك السيدة قالت لكريم ، والو هاد السمية ما عندناش والاكين تيوصلونا حالات مجهولة بحال هادي اللي خرجها الرجل دابا ، تيلقاوهوم الناس فشي بلايص بحال حدا الجبال مثلاً و تيجيبوهوم لهنا يتعالجوا
و كريم مع قالت ليه الجبال ( فين صوروا الفيلم ) مع السبيطار مع كادا ، ما ضربات ليه فراسو غير امال و هو يجبد دغية لا كارط ديالها و قال لديك السيدة '' غير بلا ما تقولي ليا هي هادي !!!! ''
الرجل ركب امال فالطوموبيل ، ديك السيدة فاش ورى ليها كريم ديك لا كارط تفاجأت و بقات غير حالا فمها ، الرجل ضار للجهة الخرى و ركب فالطوموبيل تا هو ، ديك السيدة يالله بغات تنطق بالكلمة اللولة ، كريم فهم البلان كامل و خرج كيجري
الرجل نوض الطوموبيل ، كريم مع خرج بانتليه امال واخا بعيدة عليه و لكن كانت ناعسة على الشرجم ، مشا كيجري عندهم ، الرجل بانليه كريم فالمراية كايجري و هاز لا كارط فيديه و كايغوت '' حبس حبس ، البنت اللي معاك...'' السيد فهم كولشي و تخلع ، ماعرف واش يقلع و يديها معاه ، ولا يبقى تما و يرجعها لحبابها ، ماعندوش بزاف د الوقت باش يفكر خصوصاً و انه كريم بدا كيقرب ليه
يتبع...
ليست هناك تعليقات