قصة ﺍﻟﺪﻧﻴﺎ ﻛﺪﻭﻭﺭ - الجزء 3
قصة ﺍﻟﺪﻧﻴﺎ ﻛﺪﻭﻭﺭ - الجزء 3
ﺗﻠﻔﻮﻥ ﻛﺎﻳﺼﻮﻧﻲ ...
- ﺃﻟﻮ، ﺷﻜﻮﻥ ﻣﻌﺎﻳﺎ ؟
- ﻣﻌﺎﻙ ﺇﺣﺴﺎﻥ
- ﺳﻤﺤﻠﻲ ﻣﺎﻋﺮﻓﺘﻜﺶ !!!
- ﺍﻟﻠﻪ ﻳﺎ ﻭﺩﻱ، ﻧﺴﻴﺘﺴﻨﻲ ؟ ﻟﻤﺪﻳﺮ ﺩﻳﺎﻝ ﺍﻹﺫﺍﻋﺔ
- ﺃﻩ ﺳﻤﺤﻠﻴﺎ، ﺭﺍﻧﻲ ﻏﻴﺮ ﻋﻴﺎﻥ ﺷﻮﻳﺔ ﻫﺎﺩ ﻟﻴﺎﻡ ..
- ﻟﻤﻮﻫﻴﻢ، ﺳﻴﻤﺎﻧﺔ ﺟﺎﻳﺎ ﻛﻠﺸﻲ ﻛﺎﻳﺘﺴﻨﺎ ﻓﻴﻚ .
- ﺻﺎﻓﻲ ﻣﺎﺗﺨﺎﻓﺶ، ﺍﻟﻤﻔﺎﺟﺄﺓ ﻭﺍﺟﺪﺓ.
- ﻣﺎﺗﺨﻴﺒﻨﻴﺶ ...
ﻫﺎﺩﻱ ﺃﻭﻝ ﻣﺮﺓ ﻣﺎﻛﺎﻧﻔﻴﻘﺶ ﻓﻴﻬﺎ ﺑﺎﻟﻠﻴﻞ ، ﺃﻭﻝ ﻣﺮﺓ ﻛﻨﻌﺲ ﻣﺰﻳﺎﻥ ...
ﺑﺎﻥ ﻟﻴﺎ ﺩﺍﻛﺸﻲ ﺍﻟﻠﻲ ﻗﺎﻝ ﻟﻲ ﺍﻟﻄﺒﻴﺐ ﺻﺤﻴﺢ، ﻛﻴﻔﺎﺵ ﻣﺎﻳﻜﻮﻧﺶ ﺻﺤﻴﺢ ﺃﻭ ﻫﻮ ﻣﻦ ﺃﻓﻀﻞ ﺍﻷﻃﺒﺎﺀ ﻓﺎﻟﺒﻼﺩ ؟؟
……………………………………………..
ﻟﻤﻮﻫﻴﻢ، ﺧﻠﻴﻨﺎﻫﺎ ﻓﺄﺣﻼﻡ، ﻓﻌﻼ ﺗﺼﺎﺣﺒﺖ ﻣﻌﺎﻫﺎ، ﺃﻭ ﻭﻟﻔﺘﻬﺎ، ﻧﺪﻣﺠﺖ ﻣﻌﺎﻫﺎ ﻣﺰﻳﺎﻥ، ﺑﺤﺎﻝ ﺇﻳﻼ ﻛﺎﻧﻌﺮﻓﻬﺎ ﻣﻦ ﺯﻣﺎﻥ، ﻣﺎﺑﻘﻴﺘﺶ ﻛﺎﻧﻌﺘﺎﺑﺮﻫﺎ ﻏﺮﻳﺒﺔ، ﺑﺎﻟﻌﻜﺲ ﻭﻻﺕ ﻗﺮﻳﺒﺔ ﻣﻨﻲ ﺑﺰﺍﻑ ...
ﻟﻴﻮﻡ ﺑﻐﻴﺖ ﻧﻬﻀﺮ ﻋﻠﻰ ﺍﻟﻮﺍﻟﻴﺪ، ﺍﻟﺴﻲ ﻣﺤﻤﺪ ، ﻛﻴﻒ ﻛﺎﻧﺖ ﻛﺎﺗﻘﻮﻝ ﻟﻴﻪ ﺍﻟﻮﺍﻟﻴﺪﺓ، ﻛﺎﻥ ﺧﺪﺍﻡ ﻓﺎﻟﺒﻨﻲ، ﻛﺎﻳﻤﺸﻲ ﻓﺼﺒﺎﺡ ﺃﻭ ﻛﻴﺮﺟﻊ في الليل، ﻋﺒﻮﺩﻳﺔ ﻣﻦ ﻧﻮﻉ ﺧﺎﺹ، ﻋﺒﻮﺩﻳﺔ ﺩﻳﺎﻝ ﺍﻟﻘﺮﻥ، 21 ﻛﺎﻳﻤﺸﻲ ﺑﺨﺎﻃﺮﻭ، ﺃﻭ ﻛﺎﻳﺮﺟﻊ ﺑﺨﺎﻃﺮﻭ، ﺍﻟﺼﺮﺍﺣﺔ ﻣﻜﻨﺘﺶ ﻛﻨﻌﺮﻓﻮ ﻣﺰﻳﺎﻥ، ﺣﻴﺖ ﻣﺎﻛﺎﻧﺸﻮﻓﻮﺵ ﺑﺰﺍﻑ، ﺍﻟﻠﻪ ﻳﺴﻤﺢ ﻟﻲ ﻛﺎﻧﺪﻭﺯ ﻣﻦ ﺣﺪﺍﻩ ﺑﻌﺾ ﺍﻟﻤﺮﺍﺕ ﺃﻧﺎ ﻭﺻﺤﺎﺑﻲ، ﻛﻨﺪﻳﺮ ﺭﺍﺳﻲ ﻣﺎﺷﻔﺘﻮﺵ، ﺑﺎﺵ ﻣﺎﻳﺤﺸﻤﻨﻴﺶ ﻗﺪﺍﻣﻬﻢ، ﻭﺍﺧﺎ ﻫﺎﻛﺎﻙ ﻛﻴﻔﺘﺎﺧﺮ ﺑﻴﺎ ﻣﺴﻜﻴﻦ، ﺣﻴﺖ ﺩﻳﻤﺎ ﻛﻨﺖ ﻛﺎﻧﺠﻲ أنا ﺍﻟﻠﻮﻝ، ﺃﻭ ﻋﻠﻰ ﻗﺒﻠﻮ، ﺑﺎﺵ ﻳﺒﻘﺎ ﻋﻨﺪﻭ ﻭﺍﺣﺪ ﺍﻷﻣﻞ ﻓﺎﻟﺤﻴﺎﺓ، ﺃﻭ ﻳﻌﺮﻑ ﺑﺎﻟﻠﻲ ﺗﺎﻣﺮﺓ ﺍﻟﻠﻲ ﻛﺎﻳﻀﺮﺏ ﻣﺎﺷﻲ ﻓﺎﺑﻮﺭ !
ﻣﻜﺎﻧﺶ ﻛﻴﻀﺮﺑﻲ ﺑﺰﺍﻑ، ﺣﻴﺖ ﻟﻮﺍﻟﻴﺪﺓ ﺍﻟﻠﻲ ﻣﻜﻠﻔﺔ ﺑﻬﺎﺩ ﺍﻟﻤﻬﻤﺔ، ﻭﺍﺧﺎ ﻛﺎﻧﺖ ﻣﺮﻳﻀﺔ، ﻛﺎﻧﺖ ﻛﻀﺮﺑﻨﻲ...
ﺃﻧﺎ ﺑﻮﺣﺪﻱ ﺍﻟﻠﻲ ﻋﻨﺪﻫﻢ، ﻣﻌﻮﻟﻴﻦ ﻋﻠﻴﺎ ﺑﺰﺍﻑ، ﺑﺎﻏﻴﻨﻲ ﻧﺠﺢ ﻓﺤﻴﺎﺗﻲ، ﺃﻭ ﻧﺤﻘﻖ ﺩﺍﻛﺸﻲ ﺍﻟﻠﻲ ﻣﺎﻗﺪﺭﻭﺵ ﻫﻮﻣﺎ ﻳﺤﻘﻘﻮﻩ .
ﺍﻟﻌﺎﺋﻠﺔ، ﻛﻠﻤﺔ ﻏﺮﻳﺒﺔ ﻋﻠﻴﺎ ﺑﺰﺍﻑ، ﻣﺎﻛﻨﻌﺮﻓﺶ ﺍﻟﻤﻌﻨﻰ ﺩﻳﺎﻟﻬﺎ، ﻛﻨﺴﻤﻌﻬﺎ ﻓﺎﻟﺪﺭﺏ، ﻓﻠﻤﺪﺭﺳﺔ، ﺃﻭ ﻣﻌﺎﺭﻓﻬﺎﺵ ﺃﺵ ﻛﺘﻌﻨﻲ، ﻟﻤﺼﻄﻠﺢ ﻟﻮﺣﻴﺪ ﺍﻟﻠﻲ ﻛﻨﻔﻬﻢ ﻫﻮ ﺍﻷﺳﺮﺓ، ﻓﺪﺍﺭ ﻣﻜﺎﻳﺰﻭﺭﻧﺎ ﺣﺘﻰ ﺣﺪ، ﺇﻻ ﺻﺤﺎﺏ ﻟﻮﺍﻟﻴﺪ ﻣﺮﺓ ﻣﺮﺓ.
ﻭﺍﺧﺎ ﺑﻨﺎﻱ، ﻟﻮﺍﻟﻴﺪ ﻛﺎﻥ ﻣﻬﻠﻲ ﻓﻴﺎ، ﻛﻴﺸﺮﻱ ﻟﻴﺎ ﻛﺘﻮﺑﺔ، ﺃﻭ ﻟﺤﻮﺍﻳﺞ ﺑﻼ ﻣﺎﻧﻘﻮﻟﻬﺎ ﻟﻴﻪ، ﺃﻭ ﻣﺮﺓ ﻣﺮﺓ ﻛﺎﻳﻀﻮﺭ ﻣﻌﺎﻳﺎ...
ﻭﺍﺣﺪ ﻧﻬﺎﺭ، ﺩﺭﺕ ﻣﻌﺎ ﺃﺣﻼﻡ ﻓﻠﺒﻼﺻﺔ ﻓﻴﻦ ﻛﻨﺘﻼﻗﺎﻭ ﺩﻳﻤﺎ، ﺑﻘﻴﺖ ﺷﺎﺩ ﻣﻌﺎﻫﺎ ﺳﺘﻮﻥ ﺷﻮﻳﺔ، ﻭﺍﺣﺪ ﺍﻟﻠﺤﻈﺔ ﺻﻮﻧﺎ ﺍﻟﺘﻠﻔﻮﻥ، ﺟﺎﻭﺑﺖ :
- ﺃﻟﻮ ﺷﻜﻮﻥ ؟
- ﻣﻌﺎﻙ ﺃﺣﻤﺪ
- ﺗﺎ ﻣﺎﻟﻘﻴﺘﻲ ﺇﻣﺘﺎ ﺗﻌﻴﻂ ﻋﻠﻴﺎ ﺃﺻﺤﺒﻲ !!
- ﺷﻮﻑ ﺩﻭﺯ ﻟﺪﺍﺭﻛﻢ ﺩﺍﺑﺎ ،
- ﻣﺎﻣﺴﺎﻟﻴﺶ ﺃﺻﺤﺒﻲ ﺭﺍﻧﻲ ﻣﻌﺎ ﺍﻟﺴﺎﻃﺎ .
- ﺩﻭﺯ ﺩﺍﺑﺎ ﺿﺮﻭﺭﻱ ﺃﺻﺤﺒﻲ
- ﻣﺎﻝ ﺻﻮﺗﻚ ﻣﺒﺪﻝ ؟
- ﻭﺍﺵ ﻏﺎﺩﻱ ﺗﺠﻲ ؟
- ﺃﻩ ﻫﺎﻧﻲ ﺟﺎﻱ ﺻﺎﻓﻲ
- ﻋﻨﺪﺍﻙ ﺗﻌﻄﻞ
ليست هناك تعليقات