قصة كريم فالمدينة - الجزء 6

الجزء 6

( تذكير قبل بداية الحلقة : كريم شد الباك ديالو هادي عام و من بعد بقى غير جالس فالبادية ماتدير والو قبل ما تسيفطو مو عند خالتو للمدينة باش يقرا التمثيل و امال عاد شدات الباك ديالها و هاد العام غير جالسة فالدار و كاتمشي دير دروس فالغنى مرة مرة و كتكتب و كتلحن أغاني اللي تيقة أنه واحد نهار غيتشهرو )

صبح الصباح 

فاقو لقاو راسهم ناعسين بجوج فالارض فبيتها ، تا كيسمعو الدقان  :

- امال نوضي تفطري

- هانا جاية

- مابانلكش كريم حيت ملقيناهش

- ....لا أيكون خرج للزنقة واقيلة

خرجات تلفاتهم شوية باش يقد يخرج ، خرج و دار راسو عد دخل من الزنقة :

- فين كنتي  ؟

- غير كنت كندور ولفت الأجواء د البادية الصباح 

و داك راجل خالتو تيدير فيه شي تخنزيرات ، نارييي كون عرفو كان ناعس فالبيت د بنتو  ، و فالفطور قالو لهم راه العشية غنخرجو جميع و نتا ( كريم ) بقى حضي لينا الدار حيت را غنرجعو حتال الليل ، نقزات امال قالت ليه :

- لا أنا ماقاداش نخرج

- نتي مابقاش باين لي فيك هاد اليام ، و نيت رتاحي على قبل السفر د غدا

- إنا سفر ، عاودت بدلت رايي مابقيت غادية فين

- شناهوا !!! و بغيتي تبقاي ليا هنا تيتي نيني لا قراية لا والو

- أنا الغنى هو اللي غاندير و ماشي غير جالسة را خدامة فداكشي و مازال نتشهر إن شاء الله

- وا بقاي مقابلة ليا الغنى را هو اللي غيوكلك ، عندك يسحبك هنا غنبقاو عايشين لك ديما

المهم كريم و امال تسناو اللخرين غير حلو الباب و خرجو ، و هوما بداو تيلبسو و تيتقادو و خرجو هاد المرة مشادين باليدين و غادين ، مشاو للمعهد تسجل فيه ، مشاو للريسطو تغداو و كريم عجبو الحال و بدا تيلقى راسو فالمدينة أكثر من البادية ، و ختموها بالسينما و قالو غير يسالي الفيلم نرجعو للدار باش فاش يجيو لخرين للدار يلقاونا ، و داك الفيلم زوين و طويل بقاو هاهو غيسالي هاهو غيسالي ، ماسالا تا هبط الضلام و هما رجعو كيجريو 

وصلوا للدرب بانتلهم الطوموبيل ما محطوطاش حدا الباب قالو هادو مازال ما رجعو ، طلعو بجوج عادي ومع حلات الباب تا لقاوهوم مستفين لهوم فالصالة و بدأ الحوار الناري  :

- الأب : وليتي كتخرجي ليا مع الدراري 

( ناض لها بغى يضربها ، و هو يوقف ليه كريم اللي مور هاد النهار اللي دوز معها اللي مابقى تيهمو لا يرجع للبادية لا والو )

- كريم : ولله و تقيصها 

- الأب : هاي هاي على البرهوش تحليك الفم ، و خرج عليا من داري و منعودش نشوف كمارتك عندي هنا فالدار 

- امال : إلى مشا تا أنا غنتبعو 

- الأم : اويلي ا بنتي فين غتمشي فهاد الليل 

- الأب : خليها تبعو نيت باش تعرف ، يالله سيري إلى قديتي تباتي فالزنقة أولى تعيشي فالعروبية 

- كريم : امال غير بقاي هنا ، مبغيتكش تعدبي  تا إلى درت شي دار او نجي نديك معايا 

كريم حل الباب يالله غيخرج و هي تشد ليه فيديه و دارت شافت فواليدها و قالت ليه

( غير الموت اللي غادي تفرقني عليك  )

يتبع...