قصة للصبر حدود من الجزء 81 إلى الجزء 90
قصة جديدة من تأليف Saida Aghfir ' للصبر حدود '
قصة للصبر حدود - الجزء 81
غانوقفو بالضبط فنقطة الغموض ! ( رجعت شفت فالتمثال ) باش كاتآمني يا خالة ؟ فالمسيحيين طوائف كثيرة و عقائد مختلفة و كل طائفة شادة منحى مختلف
_ الكاثوليك إنجيل يوحنا
_ أممم طيب ! أليس بالغريب أنك تقولو للرسول عيسى عليه السلام أنه إله و إبن الله ؟ خلق فكيف سيخلق ؟؟
_ وأين الغريب فالأمر !! علاش لي مايكونش إبن الله و هو تزاد بدون أي تدخل أبوي ؟
_ نحن كلنا أبناء الله بمعنى خلقنا ولكن لاا يمكن أن نقول أننا مولودون من الله أعووذ بالله !! حسناا ممكن تعطيني شي دليل فالإنجيل يقول فيه يسوع عليه السلام أنه ابن الله ؟
_ آام ( بارتباك ) لا ماكاينش ولكن ..
_ ولكن آاش طيب ممكن تعطيني شي دليل آخر فالإنجيل ذكر فيه الثالوث ؟ طبعا ماكاينش !! إذا ؟؟
_ أممم واخا ممكن تقولي لي علاش فسورة آل عمران الآية 50 من القرآن فيها أننا خاصنا نتبعو تعاليم المسيح ؟؟
_ ( بابتسامة ) ، نقولك أن المسلمين متبعين تعاليم المسيح بدون مسيحية وكفر و هناك عدة آيات تنص على الإيمان بعيسى عليه السلام و أنه من أعظم رسل الله! بل ركن من أركان الإسلام الإيمان بعيسى و رسالته و الإنجيل لي تحرف و كل إنجيل مختلف على الآخر و هذا بحد ذاتو شيء غير منطقي عكس القرآن ..
_ ( بعد صمت طويل ) واخا ممكن تقولي لي لو أن الإسلام هو دين الحق ولي يلزم على البشرية كاملة اتباعه و الدخول فيه علاش لي ما أرسلش الله محمد من الأول ؟ و علاش الإسلام جاء متأخر ؟؟
_ طيب سؤال جد جيد .. الإسلام دين الله منذ أول رجل في العالم آدم عليه السلام .. فإبراهيم موسى إسرائيل عيسى كلهم كانو مسلمين .. طيب ممكن تخبريني مثلا أن محمد لما كان صغير و كان طموحو يقرا الطب ، جاء و قال ليك أمي حطيني مباشرة فكلية الطب واش ممكن ؟؟
_ أكيد لا
_ علاش ؟
_ أول مرحلة الروضة ثم الإبتدائي المتوسط ثم الثانوي عاد كلية الطب آخر مرحلة ..
_ جيد جداا هذا هو المقصود من الله تعالى على البشرية ،، الإسلام بالمراحل شوية بشوية ! مثلا موسى عليه السلام الذي جاء بالتوراة ثم ورائه عيسى ثم محمد صل الله عليه و سلم آخر رسول و متمم الدين الحق دين الله
_ ( صمت طوييل كأن هضرتي حركات فيها شي حاجة .. يالاه بغات تهضر تا قاطعنا محمد بالمجيء ديالو )
... يتبع
قصة للصبر حدود - الجزء 82
تمر الأيام مسرعة أكثر مما ينبغي ! باقا كانتذكر مزيان داك اليوم ماعرفتش كيفاش نسميه ، مشؤوم أو سار ! حياتي تقلبات رأسا عن عقب لتتخذ منحى جديد مرة أخرى .. ها أنا ذي فشقتي القديمة بفرنسا .. مازال داخلة فصدمة من داكشي لي وقع مؤخرا ماستوعبتش الأمر
قبل * شهر * :
مرت أيام و أيام ^^ ،، الخالة جوليا و أنجيلا بداو كيقتانعو بالإسلام ولله الحمد أسلمو بفضل الله .. دوزت أحلى أيام بألمانيا ؛ رجلي بدات تتماثل للشفاء .. فهاد المدة البسيطة دخلت كانتعلم اللغة الألمانيا على الأقل نقدر نتواصل مع الناس هنا !!
أشرق يوم جديد مشمس دافئ يحمل في طياته أحداثا جديدة لست بأدرى كيف ستكون ؟ .. اليوم بالذات مختلف ؛ أخبرتني الخالة جوليا أن زوجة عم محمد غاتزورنا و غادوز شي أيام هنا في برلين بحكم أنها قاطنة في ميونخ .. خملو الدار بما فيها في حين ماخلاونيش نعاونهم بحكم رجلي مصابة
_ الخالة جوليا مايمكنش نخليكم هاكذا بوحدكم واخا غي نمسح الغبرة !!
_ ( شدات لي وجهي بين يديها ) بنتي حفصة دغيا دغيا غانساليو كيف كاتشوفي ماكايناش شي خدمة بزاف غي شي حاجة طفيفة صافي .. الأهم عندنا تعطي لرجلك الراحة ماتفورصيش عليها اوك كتكوتي
_ ولكن .. ( قاطعاتني )
_ حفصة ماكاين ما والكن ماتعارضينيش
_ صافي بقيتها خليوني نوجد لكم أكلات مغربية الطبخ ماغايضرش برجلي
_ ( هزات حاجب ونزلات حاجب ) اممم
_ عافااك خالتي ماغانضغطش علر رجلي غانطبخ غي بالمهل ماتخافيش راني وليت بخير الحمد لله
ماتسنيتهاش ترد عليا و توجهت للمطبخ ، بقيت كانفكر شنو مممن نطبخ لهم خصوصا الخالة حوراء ( اسم زوجة عم محمد ) قادمة فالغذاء .. بما أنهم ماكيبغيوش يتقلو بمعنى ياكلو شي حاجة صحية و خفيفة قررت ندير لهم دنجال مشرمل في الفران ؛ التكتوكة و سلطات أخرى .. بديت فالتوجاد حسيت بواحد السعادة بحكم أن الطبخ من هواياتي المفضلة و فنفس الوقت قلبي مقبوض و مامرتاحاش نهائيا !! شعور أخافني ولكن حاولت تجاهله و عدم إعطائه قيمة طنا مني أنه تلبيس إبليس و كيده .. إستعذت بالله و أشغلت نفسي بالإستغفار .. يتبع
قصة للصبر حدود - الجزء 83
صوت غريب عليا أول مرة نسمعو ، اخترق مسامعي و أسرى على باقي أعضائي قشعريرة و رعشة عجيب !! صوت رن في قلبي و أحيا إحساس لم أشعر به يوما قط .. فجأة تقلص قلبي و نغزات كالسكين كدت أسقط .. حطيت ما فيدي و سندت على الجدار أتنفس بسرعة قلبي كيضرب أكثر من المعتاد .. شهيق زفير لعله يعود لوضعه الطبيعي و لعل صدري يتنفس شوية !! .. بدأت بتلاوة آيات من الذكر الحكيم ارتحت نسبيا ؛ ماعرفتش هادشي مناش يمكن من كثرة الضغوط النفسية فالمدة الحالية .. بقيت على هاذ الوضع وسط أمواج من الأفكار تاديني و تجيبني سمعت طقطقات حذاء يقترب قاديت وضعي بسرعة ورسمت ابتسامة مصطنعة لعله مايعيقش بيا .. كانت الخالة أنجيلا بحلتها الأنيقة و نظراتها البريئة
_ بنيتي حفصة الضيفة جات ممكن تفضلي معايا يا عزيزتي
_ ( توجهت نحوها بنفس الإبتسامة كانعرج شوية مشيتي مازال ماتقادات ولكن حيدت العكاز ) حاضر خالتي
في الصالون جالسة المدام حوراء عاطياني بالظهر و كانت محتجبة ، كما أخبرني محمد أنها أول وحدة دخلت للعائلة مسلمة ..
_ حوراء
_ ( التفتت بابتسامة سرعان ماجمعتها مني شافتني وجهها ولا أصفر ) اآ ام نعم ( سهات فيا )
_ ( ابتسمت ليها ) السلام عليكم يا خالة كيف حالك
_ عليكم السلام و رحمة الله حمدا لله بنيتي لا شك أنك انت حفصة صح ؟؟
.. يتبع
قصة للصبر حدود - الجزء 84
حسيت بنظراتها تخترقني ، كأنها كاتقلب على شيء فوجهي ! لونها أصبح شاحبا ! حاولت نتفادى نظراتها أربكوني جالسة على أعصابي .. حسيت بشيء غريب جدا شنو هو الله أعلم ؛ بقيت جالسة شوية من بعد استأذنت طلعت لبيتي ، نفس الإحساس الوساوس لا تكاد تفارقني ،، هذا اليوم الثاني ليها هنا .. كانحاول قدر الإمكان أني نتفاداها و نتفادى الاحتكاك معاها ولكن نفس الوقت حاولت نصد أي تصرف يقدر يشككها فيا ..
هابطة مع الدروج و شاداني البكية لحد الآن ماعارفاش راسي من رجليا شنو واقع ليا !!
توجهت للصالون طلبا من محمد نجلس معهم شوية .. بحكم أن محمد هاذ الأيام قليل فاش كانشوفو بسبب خدمتو الإستخباراتية ؛ المشكل د القاعدة الجوية الإسرائيلية تحل و رجعات المياه لمجاريها .. ميري و جاك لا خبر عليهم لحد الساعة
اتخذت مكاني فالكنبة بجنب الخالة جوليا ؛ مدات ليا فنجان قهوة .. فجأة بدون سابق إنذار كانحس بسلسة ديالي تحلات و طاحت أرضا .. مديت يدي نهزها حتا سبقاتي أحد الأيادي !! هزيت عيني كانت الخالة حوراء هازاها و كاتأمل فيها .. ناضت بطريقة هستيرية عينيها امتلؤو بالدموع .. شافت فيا
قصة للصبر حدود - الجزء 85
م مم .. ماياا ( نزلو دموعها )
مافهمتش آش تاتقصد و شكون مايا !! شفت فالخالتين جوليا و إنجيلا و محمد هوما الآخرين في نظراتهم و وجوههم علامة الحيرة و الدهشة ..
مانطقت بحتا شي كلمة تربط لساني !! توجهات عندي شداتني فالذرعان ديالي و كاتديني و تجيبني
_ هضرييي شكون انت و فين جاتك هاذ السلسلة
_ ( بخوف و ترقب ) الالة السلسلة يمكن تشابهات لك مع شي وحدة أخرى ماشي هي الوحيدة لي كاينة فالعالم و من الفوق أنا من المغرب
_ ( طاحت على ركابيها ) لاا مايمكنش هاد السلسة تصنعات خصيصا لبنت ختي .. فين جاتك دوي ( انهارت بالبكاء )
_ ( طاح لي الماء فالركابي لساني ثقال عليا احساس جد فظيع ) لا مستحيل ( نطرت لها السلسة من يديها ) السلسلة ديالي و ممكن تقولي هي الذكرى الوحيدة من واليديا لي رماوني فالميتم فالمغري بالضبط فمدينة الرباط
ماقدرتش نتحمل هبطو دموعي و اتجهت نحو الغرفة ديالي حتا توقفني هضرتها لأصدم من جديد
_ انت هي مايا اهئ مايا بنت اختي إهئ الله ياخد فيه الحق لي رماك فالميتم الله ياخذ فيه الحق
_ شش شنو كاتقولي مستحييل مستحيل ( هبطو دموعي )
_ إهئ لاا حتى حاجة مامستحيلة انت انت من أم ألمانية و أب مغربي انت ماياا
نزلات عليا الصاعقة زلزلاتني ، تربط لساني لأعجز عن النطق .. يكفي صدمات يكفي
_ أنا حفصة ماشي مايا أنا ما بنت احد أنا مقطوعة من الشجرة ما عندي لا أب لا أم و من الفوق باش عرفتيها هه راه ماشي أنا بوحدي لي كاين.. ( قاطعاتني )
_ ( توجهات عندي ) ماشي انت بوحدك لي كاينة ولكن كولشي كيدل على أنك بنت سيلفيا اختي لي حاليا مرمية فمشفى الأمراض العقلية من نهار خطفوك من نهار خداك بالقوة المجرم الله ياخد فيه الحق .. كاتشبهي ليه بزاف نسخة طبق الأصل من الأب ديالك لكن لا شبه بينكم فالاخلاق و الشخصية لا أبداا .. يتبع
قصة للصبر حدود - الجزء 86
مابقاش عندي النفس لي نطلع ، ضاقت عليا الأرض بما رحبت ، آاه يا ليت الطفولة تعود يوما ! فقلبي لا يتحمل أعباء الدنيا ..
_ ( كانضحك بهستيرية و فنف الوقت بكاء ) لا لا أنت لاعبة معايا ياك هههه لا مايمكن ( توجهت لعند الخالة جوليا ) خالتي دوي هضري قولي ليها غي كاتكذب قولي ليها بلي أنا مقطوعة من الشجرة قولي ليها ماعنديش أبوين ( رجعت للوراء و كانشوف واحد بواحد ) إهئ هضروو دويو مالكم سكتو إهئ إهئ
طحت على ركابيا فشلت اختل توازني .. ظل قرب مني و نزل على رجليه كانت هي حواراء ! هزيت عيناي الممتلئتين بالدموع ، نظرة حزن ألم حسرة شعور لا يوصف ، انتشلت أشلائي بين حطام وركام الألم عجزت عن النجاة .. يا الله
رفعات يديها محاولة مسح دموعي لكن ! سرعان ما وقفت على رجلي اتجهت نحو الغرفة ناطقة
_ بغيت نبقا بوحدي جزاكم الله خيرا يكفي يكفي مابقيتش قادرة
_ بنتي مايا ماتقتليناش هكذا ( بالبكاء ) إهئ آه لو تعرفي مناش دزنا في رحلة البحث عنك .. ماتقطعيش حبل آمالنا مادمريناش !!
** حاليا **
كلمات تتردد على مسامعي في كل حين و مكان .. ( تنهدت بعمق شديد محاولة مني نحيد ولو القليل من الثقل ) .. رجعت لفرنسا بعد جهد مني و محاولات كادت تبوء بالفشل !! رجعت خليت كولشي ورائي الأم ديالي هه مصطلح جديد عليا عمرني عرفت مذاقو و حلاوتو كيف هي ؟؟ .. ماشفتهاش بغيت نبعد على كولشي ! يكفي لي قاسيت يكفي لي دوزت ، شباب بعقول خمسينية هكذا أنا !! .. إلى متى الهروب ؟
توجهت مباشرة خديت هاتفي أجريت إتصال لألمانيا ،، يرن و كان المجيب
_ السلام عليكم و رحمة الله ؟
_ عليكم السلام و رحمة الله الخالة هند ( أنجيلا قبل الإسلام الآن غيرات إسمها )
_ ( صمت ثم تنهيدة ) ياا بنتي حفصة فينك و فين غبرتي علينا ،، حشومة عليك و مادرتي فينا
_ خالتي عذروني والله ما لخاطري و الله إني لكنتقطع مئة مرة فاليوم تأزمت نفسيا بغيت نبعد على كولشي نفسي أيضاا !!
_ آه يا بنتي وهل من سبيل للهروب من الواقع و الحقيقة لو كان كذلك لاختفى الكل من زمان صبرا يا بنيتي صبرا فالله معك
_ ونعم بالله العظيم .. صراحة أمم أنا المهم ان شاء الله الأسبوع القادم غانكون تماك بغيت نحل الأمور المعقدة بغيت الحقيقة .. يتبع
قصة للصبر حدود - الجزء 87
حاطة راسي على الزاج ، أمواج من الأفكار تحيط بي من كل مكان ! دوامة ممتزجة خوف ترقب رهبة ! اشتياق و انجذاب لحظن الأم منبع الحنان و الأمان ، أغلقت عيناي الذابلتين بحسرة و ألم .. فيقني صوت المضيفة لتعلن عن ابتداء الرحلة ..
_ المرجو من المسافرين وضع حزام الأمان ستبتدئ الرحلة بعد قليل
قاديت وضعيتي لأتمكن من وضع حزام الأمان ؛ استرخيت ثم طلبت كأس شاي أسود .. حملت القرآن كلام الله مؤنسي الوحيد في كربتي ربيعا لقلبي و جلاءا لهمي .. تلاوة مع تدبر ثم خشوع إحساس بالراحة إنشراح و طمئنينة أمان ^^ ،، رفت كفاي دعوت ربي من أعماق أعماق قلبي .. أغلقت عيناي من جديد مع الإستغفار حتا كيفيقني شي حد لمسني بدون قصد جالسا أمامي ! كانت عجوزا قد بلغت من العمر عتيا ، تجاعيد شقت بشرتها البيضاء الناصعة عيناها الخضراوتان .. شعرها الأبيض الحريري ؛ بابتسامة مريحة جعلتني أبتسم بدون شعور
_ سمحي ليا يا ابنتي ماقصدتش نفيقك ^^
_ لا يا خالة أصلا ماكنتش ناعسة و كيف يزور النوم جفوني و أنا في هاذ الوضع ( ماعرفتش كيفاش وعلاش بديت هكذا !! و كأني كانعرفها )
_ حزن عميق على عيناك البريئتين بنيتي ، تحملت فوق طاقتك ! عطيتي كثر من جهدك .. خذلوك بزاف كذا ساعدوك بزاف ؛ نيتك صافية قلبك طاهر و روحك لم تتلوث بأوساخ الدنيا .. عشتي وحدك قاسيتي و عانيتي بكيتي و ضحكتي صبرتي كرهتي و سامحتي ! شأنك كشأن جميع البشر لكنك مختلفة ! صابرة وفية لدينك و إلاهك أحييك بحرارة مادازش عليك القليل
كيف ثم كيف كاتعرف عليا هادشي !! هئ نسيت أن عيناي كيحكيو كل شيء " قصة حفصة في مواجهة الحياة " ماقدرتش ننطق العجوز تبتسم في وجهي ثم أغلقت عيناها و قادات وضعها من الجلوس للنوم .. غفوت للمرة الأولى بسلام لأستفيق مرة أخرى على صوت المضيفة .. يتبع
قصة للصبر حدود - الجزء 88
نزلت من جديد على الأراضي الألمانيا ، جوها اللطيف المنعش ! الهدوء الباعث للإطمئنان .. قلبت بصري يمين و شمال حتا طاح على محمد و الخالة هند و الخالة عائشة ( جوليا بعد الإسلام أيضا غيرات إسمها ) ،، متوجهة تجاههم قلبي كيضرب بسرعة فائقة شاداني الخلعة و الفرحة فنفس الوقت ! أتمشى بخطوات تابثة متثاقلة .. لمحاتني الخالة عائشة ؛ توجهت عندي مسرعة لتظمني بقوة كنت على سبة بدأت بذرف دموع حارة سرعان مامسحتها و رسمت على شفتاي ابتسامة اشتياق لهاذ الناس طيبة .. توجهات عندي خالتي هند هي الأخرى ظمتني عندها ،، محمد كان حادر راسو كما العادة ألقيت عليه السلام من بعيد
ها أنا ذي مرة أخرى فنفس الشقة فنفس الغرفة ذكريات فائقة الجمال و الأخيرة مرة .. صليت الظهر الذي رفع قبل قليل ؛ تلوت وردي من القرآن رددت أذكاري ثم بدأت بمراجعة الأحزاب المحفوظة .. حتى طرقت مسامعي نبرات صوتية مألوفة ! جمعت الوقفة بذعر دقات قلبي أحدثت تسارعا كاد يفقدني وعيا ، شهقت جيدا زفرت ابتغاءا مني باش نتهدن استعذت بالله ، توجهت متبعة أبعاد الصوت كل خطوة ثقييلة عليا .. لتقع عيناي في عيناي خالتي حوراء ليس الإسم فقط حوراء الخالة البيولوجية آاه وانا لي عمرني عرفت معنى العائلة !
قصة للصبر حدود - الجزء 89
تسمرت فبلاصتي ماقدرتش نزيد نقرب ! اتجهت نحوي و عيونها ممتلئة بالدموع .. عنقاتني بقوة
_ بنتي مايا إهئ توحشتك آبنتي توحشتك
_ أممم ( هبطو دموعي ) بغيت بغيت نعرف كولشي بغيت الحقيقة !
أمسكت يدي و جراتني معها للصالون جلسات و جلست جنبها ..
_ ( بعد صمت طويل كأنها تحاول نسيان و عدم تذكر ما جرى غمضات عيونها بألم ) كانت بنت جد جميلة ! بريئة بقلبها الطفولي روحها الطاهرة .. كنا زوج بنات أنا الكبرى و سيلفيا الصغرى ؛ من أطيب خلق الله تحب فعل الخير و عمرها فحياتها آذات شي احد .. كنا أبناء أغنى رجل فميونخ أموال طائلة ؛ عمرها اهتمت للمظاهر أو الثروة جد بسيطة فلباسها و تعاملها لذا كانت محبوبة الناس ؛ حينها كانت تدرس في السنة الثانية طب كانت المهنة لي كاتحماق و كاتطمح لها من صغرها .. ( بالدموع ) إهئ مانقدرش نكمل لك من الأفضل سيلفيا لي تحكي لك
_ بغيت نشوفها فين كاينة ؟؟ بغيت أمي
_ أنا متأكدة أنها غاتشوفك غاتولي لباس و ترجع كيف كانت ، قاسات بما فيه الكفاية آاه
_ ان شاء الله خير ، أمم خالتي ماذا عن بابا ؟؟ فين هو ؟
_ ( ابتسمت باستهزاء ) هو سبب هادشي موحالش واش يكون آدمي ، انقطعت أخبارو منين داك للمغرب عيينا مانقلبو ولكن لا شيء !! ولكن مؤخرا سمعنا أنه بفاس و لما ذهبنا باش نشوفوك و نعرفو فينك مالقينا تا أثر ليك !! ..
قصة للصبر حدود - الجزء 90
سبب أو أسباب متعددة ! تلات بيهم الأيام و فقدو عقولهم .. صدق الله تعالى حين رفع عنهم القلم حتى يستعقلون .. حديقة واسعة زهور بشتى الألوان ، أشجال و نباتات متعددة ، لباس موحد البذلة البيضاء ؛ كبياض عقولهم .. منظر مبكي مؤثر كاين لي هاز ألعاب محشوة كاين لي كيتكلم بوحدو حركات و تصرفات غريبة ،، سهيت لأجد نفسي تابعة خالتي حوراء .. ركابيا فشلو حاسة بإحساس غريب اختلاط المشاعر ! واش فعلا غاتعرفني ؟ غايكون تجاوب معايا ؟ واش غاتحس بيا ؟ أسئلة لم أكد أجد لها جوابا مقنعا ..
يوقفنا فالطريق طبيب لي عرفتو من خلال الباتش لي معلق ؛ سلم على الخالة حوراء أظن كيعرفها
_ جيتي تشوفي سيلفيا أمدام ياك ؟
_ وي دكتور عارفة أن زيارتي لا تجدي نفعا و العلاج أيضا ماعاطيش نتيجة و ماتجاوباتش معك و لكن اليوم حاجة مختلفة ( جراتني حداها تا وليت أنا وياها فنفس المستوى ) اليوم معايا أغلى شخص على سيلفيا و متأكدة 100% غاتحسن ..
_ واخا تفضلو معايا نتمنى يكون خير
مانطقت بحتا كلمة لساني تجمد اضطربات فالداخل ديالي بين الخوف و الاشتياق العتاب و الحنين ..
وقفنا فجأة أمام غرفة بابها أخضر فاتح عليها رقم 13 .. فتح الطبيب الباب تقدمنا شوية كانو أربع أسرة فالغرفة ! ثلاثة خاويين و واحد كان يحمل هي أمي المصطلح الذي ظننت أني عمرني نطقو ها أنا الآن أمامها .. تقدم الدكتور و معه الخالة حوراء أنا هه ماقدرتش نتقدم خطوة إضافية كأن هناك مغنطيس مثبتني على نفس المنطقة ..
امرأة فالأربعينيات ؛ شعر أشقر تخلله البياض .. ماقدرتش نميز ملامحها جيدا كانت مكمشة و ضامة رجليها إليها و حاطة راسها وسطهم .. جلسات جنبها الخالة حوراء في حين الطبيب اكتفى أنه يراقب دفتر المعطيات لي على السرير .. ربتت حوراء على كتف أ .. أمي رفعت راسها ملامح شقرااء عيون زرقاء شقت التجاعيد وجهها ؛ الهالات السوداء محيطة بالعينين .. شكيت للحظة في أنها واش فعلا أمي لأني ماكانشبهش لها مطلقا !! .. كانت مصدومة لا تتحرك أبدا مركزة عينيها على نفس المكان ولو محاورة الخالة لها .. رفعت حوراء بصرها تجاهي .. أشارت لي بمعنى نمشي حداها .. توجهت بخطوات جد متثاقلة و كل خطوة كايزيد قلبي يدق
وصلت
ليست هناك تعليقات