قصة للصبر حدود من الجزء 41 إلى الجزء 50
قصة جديدة من تأليف Saida Aghfir ' للصبر حدود '
قصة للصبر حدود - الجزء 41
منغمسة فالخدمة ديالي و مركزة معاها حتا سمعت طقطقات الكعب العالي هزيت عيني و اذا هي السكريتيرة ديال رافييل !! فيديها عرام د الملفات داخلة بتمايل و ضحكة شريرة مستفزة متجهة نحوي ، حطات الملفات بنطرة
السكرتيرة : قالك سي رفاييل راجعي هاد الملفات من هنا العشية يكونو واجدين
أنا و عيني فالكم الهائل د الملفات !! هادشيي كامل من هنا العشية يااا الله يالاه هزيت عيني باش نسولها لقيتها غبرات ، صافي هادي الأخرة ليا
حطيت داكشي لي كان فيدي و شديت راسي صافي تقاداو ليا حرام عليه آش بغا عندي ،، حسيت بيد حوطاتني من عطرها عرفتها ميري ،،
ميري : حفصة عافااك ماتقلقيش ماديريش فخاطرك هانا غانعاونك صافي غانساليوهم ان شاء الله من هنا العشية
أنا : ميري بلا مانعذبك معايا و نتعذب على والو صافي غايطردني غايطردني اللهم نخرج براسي مرفوع
ميري : ماتقوليييش هكاك نوضي يالاه باراكة من اليأس و الإحباط ، انت مسلمة دينكم ماكيقولش ليكم هكاا نوضي معايا يالاه توكضي
كلامها نوضني من جديد الله ماكيقولش لنا يأسوا ماكيقولش لنا استسلمو ! خاصنا نكونو أقوياء نعيشو من أجلنا نكونو كل شيء لأنفسنا بلا مانتسناو من سي حد يعاونا ...
قصة للصبر حدود - الجزء 42
و كم أنت فاتنة يا دنياآ ثريتي ثريتي فقد طلقتك ثلاثاا و أعلنت الرجوع لرب العالمين ،، إلى متى المحيا ؟ فهل سنعيش غدا ، كل همومنا غدت دنيوية فما قدمنا للقاء ربنا !! تهنا في دنيا فانية ستتحطم و لن يبقى منها سوى الأعمال ؟ يا بني آدم أتدري أن أجلك مكتوب ؟ أتدري أن العاقبة للصالحين ؟ و سوء المآب للمجرمين ! عش كما شئت و افعل ما شئت الأمر بيدك فأنت ميت و هم ميتون فأحسن عملك ..
آه يا رب نعمك لا تحصى ولا تعد قصرنا و أذنبنا أخطأنا و لكن ! استغفرنا فغفرت ربااآه ما أكرمك ما أعظمك يا بديع السماوات ..
طاحو ليا الدموع بدون ما نحس ! ماذا قدمنا للإسلام ؟؟ ماذا قدمنا للآخرة .. ماقدرتش نحبس دموعي لأني فجأة تصورت نفسي في جهنم حميم و غساق عذاب ألييييييييم نعووذ بالله قلبي تزير حسيت بندم ! و فجأة حطيت راسي فالجنة نعيم أبدي لنا فيها ماا نشتهي و كم أحقرك يا دنيا .. وعدنا الله ما لا عين رأت و لا خطر ببال بشر كيفاااش كانبيعوها بشي حاجة ماكاتسوا واالو أمامها ! دنيا زائلة لا محل لها من الإعراب ..
لمحاتني ميري كانبكي انتفضت من مكانا و اتجهت مسرعة لعندي تحنات على ركابيها شدات يدي كاتواسيني ماعارفاش شنو السبب ولكن كيما قلت ذات قلب كبيير صافي ، بقات ساكتة فهمت أنها كاتسناني نهضر
أنا : ميري عرفتي شنو ندمت ندمت على كل شيء فاات على كل دقيقة و ثانية فرطت في ديني و في جنب ربي ياا الله
ميري : دينكم زوين بزاااف قريت عليك كثر ما كاتصوري لقيت فيه الأمان عكس الأديان الأخرى كولشي فيها مامفهومش او بالاحرى محرف ، أتأسف حقاا مني كانشوف المسلمين مفرطين فدينهم و متبعين الشهوات و الغرب !! فعلا عجييب لأهم كيضيعو كل شيء ماشي حياتهم فقط ( هبطات راسها و كأنها كاتبكي )
أنا : (رفعت لها وجهها و حوطتو بيدي ) شنو السبب لي مامخليك تسلمي ؟ كلشي واضح بين يديك توكلي على الله و يسعدني بزااف نكون اول من شهد على إسلامك بعد الله تعالى
ميري : ( تنهدات بعمق ) اوووه خايفة خايفة من كولشي خايفة من أهلي لي هوما مسيحيين متشددين بلا قياس و متعصبين خايفة من المجتمع ماعنديش الشجاعة الكافية
قصة للصبر حدود - الجزء 43
مابغيتش نزير عليها عارفة ماشي ساهل تكبر فعائلة مسيحية متدينة و انت الوحيد لي غاتعتانق الإسلام فيهم عارفة غايرفضو رفض قطعي و ممكن توثل لدرجة يجريو عليها و يتبراو منها !! عارفاها ان شاء الله غاتسلم ^^ خاص الوقت مانضيعوش نشجعها بالتي هي أحسن ،، ومن حسن الحظ كملت الخدمة لي لصقها فيا رافييل حمدا لله بمساعدة ماري ، توجهت لعند السكرتيرة و حطيت لها الملفات بهدوء عكس ما دارت ،
أنا : قولي لسي رافييل راني كملتهم و راجعتهم بتدقيق و صححت الأخطاء لي فيهم ، آاه و اذا كانت شي حاجة أخرى مرحبا هه
انسحبت قبل ماتهضر و رجعت لمكتبي بافتخاار غمزت ماري لي ضحكات بدورها هزيت صاكي و خرجنا لأنه موعد الخروج
طول الطريق وحنا كانتناقشو فمواضيع مختلفة فالإسلام انبهرت لأنها عارفة أكثر من أغلبية المسلمين واا أسفاء مضحك مبكي فعلاا ، البريق ديال عيونها كيتزاد مني كاتهضر على الاسلام ^^ ،، ودعتها في حين أنها كملات طريقها لأننا مابعادش بزااف غي شي زقاق لي مفارقينا .. دزت على حسناء لي ولدات وليد سماوه محمد أميين أحسن إسم فالعااالم بأكمله ، ما شاء الله عليه نهار على نهار كيكبر خرج زوين بزااف اللهم بارك ملامح عربية سوداء ^^ حفظه الله ، طلعت للدار بدلت عليا و كليت و طحت كااااو نعست فقت مع المغرب قد قد ..
قصة للصبر حدود - الجزء 44
دازت أيام و جات أيام واليووم فقت على صوت العصافير صباح مشمس و مبهج ،، اليوم الأحد راحة يا سلام الخدمة صعيييبة عندي و زيد عليها رافييل لي وقتما لقا فرصة كيزير عليا ، فطرت و ضربتها بتخميلة للدار نقيتها مزياان و الغذاء فوق البوطة كيطيب ،، شوية سمعت دقان !! شكون يا ترى ظنيت أنها تقدر تكون حسناء ،
أنا : شكون ؟؟
ميري : حفصة هاذي أنا ميري
فرحت بزااف هاذي اول مرة تجي عندي فتحت الباب بفرحة ، ولكن مادامتش هاذ الفرحة مني لقيت ميري حالتها حالة عينيها منفوخين و حمرين بالبكاء صفرة تخلعت عليها فديك اللحظة يالاه غانسولها تلاحت عليا عنقاتني
ميري : حفصة
( كاندوز لها على شعرها ) : نعم حبيبتي آش كاين خوفتيني عليك بزااف ياك لاباس انت بخير مامريضاش !!
طلقات مني و رجعات شوية بالوراء ، ابتسمت ابتسامة فرحة مسحات دموعها ، رفعت صبعها على وضعية التوحيد و بصوت متقطع بالعربية
ميري: أشهد أن لا اله الا الله و أن عيسى رسول الله و أشهد أن محمدا عبده و رسوله الذي أرسله الله بدين الحق ليظهره على الدين كله صل الله عليه و على إله و صحبه و سلم تسليما
أنا فهاذ اللحظة اوووه يا رب إحساس لا يوصف طاحو دمعتي تأثر و فرحة نزلت و سجدت سجدة شكر طويييلة بكيت فيها و شكرت الله اللهم لك الحمد ، نضت و مازال كانمسح دموعي
أنا : الله أكبر الله أكبر
عنقتها بكل ما أوتيت من قوة و حب و فرحة و بدينا كانقزو بزووج و فرحة عارمة لا تووصف ..
قصة للصبر حدود - الجزء 45
كعادتي جالسة فالبيرو كانخدم ! ماري لي حولات إسمها لمريم ^^ لبسات الخمار الحمد لله بعد ما كان جوابها مبكي حقااآ - مريم : حفصة غانلبس الخمار بحال ديالك متشوقة ليه بزاااف كانحس براسي ناقصة لدرجة كبيرة ماعنديش حماية كأنني سلعة كاتشاف من جميع أصناف البشر !! أنا ثمينة و مابغيت يشوفني غير لي يستاحقني شرع الله و لازم يتطبق و أنا فرحاانة بيه حقا و الله عرفت أن الحجاب ماشي قطعة قماش فقط لا بل هو أيضا حاجب من الجانب الجسدي من أجل إبراز الجانب العقلي و الفكري بكل حرية و بدون التعرض لأي مضايقة ..،، من بعد إسلامها طرداتها عائلتها من البيت للأسف ! ولكن و لله الحمد جات سكنات معايا وونساتني بزااف بلا قياس حطينا برنامج يومي لتدارس الفقه و الدين ،، و التحقنا بأحد المساجد و بدينا كانحفظو مع أخوات أخرين منهم مغربيات و باكيستانيات و جزائريات ... سمعنا صداع قوي بأصوات رجالية فالاستقبال بالضبط .. كولشي خرج يطل شنو واقع توخرنا أنا و مريم و بقينا كانراقبو من بعيد ، كيبان لينا رافييل و الشابان الشركاء لي معه مارك و جاكسون ، كيغوت و كيضحكو باستهزاء كبير ! علاش ؟؟ طولت النظر ديالي و بان لي ملتحي شاب لابس التقصير هاز فيديه ملف كانظن السيفي فعينيه الدموع و حادر راسو !! قربت شوية نسمع آش كاين
رافييل : ههههااء قالك بغا يخدم سير سير انت يصلاح ليك تسيري الصبابط ولا طلب قدام الجامع لأن مظهر مثير للشفقة دغيا دير لي فيكتيم
مارك و جاكسون : ههههه قالك بغا يخدم
أنا هنا جهلت صافي ماقدرتش نتحمل نشوف خويا فالإسلام كيتهان بهاد الطريقة و الأسلوب واخا يكون ماشي بشر !! واش مافقلبهومش رحمة أو شيء من التواضع ولاش كاع منوضين هاد الحيحة ؟ إاه نسيت باغين أي فرصة باش يهينونا و يطردونا
قصة للصبر حدود - الجزء 46
مافكرتش فالمنصب آو الخدمة لي غاتمشي ليا للصبر حدود و الضغط يولد الإنفجار تجاوز حدودو بزااف و ماغانسمحش لسه يتطاول على السيد هاكذا !! شفت فمريم لي فهمات قصدي و ابتسمت ليا بمعنى توكلي على الله .. بديت كانصفق كولشي سكت و دار يشوف شكون هذا ولا هاذي رفاييل و مارك و جاكسون كييخنزرو و فنفس الوقت بتعجب ! ،
أنا ( موجهة ليهم كلامي ) : وصل بكم المستوى لهاذ الدرجة دومااج لأننا فعلا مازال كانقلبو على التسامح فالغربيين أوبس لأنه أصلا منعدم ، ( نعت بصبعي للشاب ) شفتووه هو سيد سيادكم سمعتو انتوما ماكاتسواو واالو قدامو !! مستوى منحط بذيء ! كيدل على تربيتكم و المستوى ديالكم ايه طبعا شنو نتسناو من عنصريين بحالكم لا دين لا دنيا لا مستوى !!
رفاييل : اووه شوف شكون كيهضر المعقدة الخنيشة المتحركة ههههه
يالااه غانجاوب سبقاتني مريم
مريم : خنيشة ماذا عنكم ؟؟ ماعندناش الوقت باش نبداو نديو و نجيبو معكم فالهضرة علاش ؟ لأنكم أصلا بلا عقل بلا مستوى زيروو لا شيء
أنا : غاتبقاو حاضيينا حضيو راسكم بعدا و سيرو قلبو على الراحة و الانشراح فبلاصة اخرى ماشي قلة الأدب و انحطاط المستوى الخدمة خليناها ليكم ربحو بيها الله يعاون
اتجهنا للمكتب هزينا صيكانا فالباب التقينا بالشاب لي ابتسم لنا ابتسامة امتنان و شكر خالص بادلناه نفس الابتسامة و شدينا الطريق ، طول الوقت و حنا فرحانين لأننا بالنسبة لنا درنا إنجااز ماحزنناش على الخدمة أبدا لأننا أصلا ماكناش حاملينها ارتاحينا منها ،، كان وقت الغذاء توجهنا لماكدو خدينا الطلبات من بعد التأكد من خلوها من أي عناصر محرمة ..
قصة للصبر حدود - الجزء 47
أنا : الله الله وليت فآخر أيامي كانتشومر هههه
مريم ( و كاتخشي ففمها ) : قلبي الصغير لا يتحمل ولينا زوفريات ، غي تهناي غدا ان شاء الله ندفعو السيفيات للشركات عطاهم الله هنا موجودين
أنا : شتي ما دمنا نهينا عن منكر سمعناه و شفناه ربي ماغايتخلاش عليها و أكيد أكيد موراها خير كبير
مريم : و نعم بالله و الله تا حسيت برااحة لا مثيل لها كأن شي جبل كان على قلبي و تحيد
أنا : مثلك ماكنتش أصلا مرتاحة من الأول !!
مريم : آجي إيمتاش عندنا الإمتحان فالحفظ و القواعد
أنا : 20 نوفمبر خاصنا نوجدو مزيان ان شاء الله عندنا 7 أحزاب نسأل الله التوفيق
كملنا غذانا أنا و مريم و شدينا الطريق متوجهين للمنزل دخلنا بعدما كنا صلينا فالمسجد لأن أدركنا وقت الصلاة فالطريق ..
توالت الأيام و الأسابيع كل نهار نخرجو نقلبو على خدمة ، ما يئسناش الحمد لله عايشين أنا و مريم فجو سعيد مطمئن منشرح تحت طاعة الرحمن سبحان الله ..
أنا : نااري مريم ماعرفتش فين هو مصحفي المترجم بالإنجليزية !! مالقيتوش الله يا ربي و عزيز عليا بزااف
مريم : واش هذاك لي عطاتك الهالة حكيمة كادو فاش كنتي فالمغرب
أنا : ااه هذاك عزيز عليا بزاااف كانشم فيه ريحة ماما حكيمة ..
مريم : ( جات تتقلب معايا ) متأكدة قلبتي مزيان ؟؟ شنو آخر مرة هزيتيه فيها ؟؟
أنا : ( كانتفكر ) امم .. لاا مايمكنش !! ياا الله ...
قصة للصبر حدود - الجزء 48
أنا : مريم خلييتو فالبيرو ديالي فالشركة
مريم ( حلات عينيها بصدمة ) : دابا آشنو المعموول !!
أنا : غانمشي نجيبو مستحيل نخليه يضيع مني و يطيح فيدين علم الله آش غادير ليه كلام الله
مريم : واخا تسناي نمشي معك ماعرفتيش آش غايوقع
أنا : لا آمريم غي جلسي و نيت حفظي شوية ماتخافيش عليا معايا الله ^^
نضت فديك الساعة بدلت لبست خماري و خرجت شديت طاكشي تا لمقر الشركة أول مانزلت تفكرت الذكريات هه ضحكت بسخرية و توجهت مباشرة لعند السكرتيرة ، طلعاتني و هبطاتني بحتقار
السكرتيرة : اوو شكون جا ماكانش فخباري بلي باقي عندك الوجه
أنا ( بابتسامة ) : ماجاياش عندك على ما أظن جيت نقلب على شي حاجة غالية ثميينة ماعندها تا ثمن لي للأسف نسيتها فهاد الشركة ديال الذل ،
ماتسنيتهاش تكمل دخلت للمكتب ديالي القديم لقيت واحد الشاب بلاصتي سولتو على واش شاف المصحف أجابني بالنفي مايمكنش أنا متأكدة بدون شك خليتو هنا !!
السكرتيرة : بما أنك مالقيتيهش يمكن لك تفضلي
ماحاشيتهاش لها توجهت نيشاان لمكتب رافاييل واخا منعاتني باش ندخل ولكن شكون داها فيك كان طالع ليا الدم !! دخلت بلا ماندق لقيتو واقف قبالت الشرجم كيطل و مامسوقش
رافييل : على السلامة آش جايا ديري هنا
أنا : فين مصحفي
رافييل : ( دار عندي و عينيه حمرين ضعاف بزاف ) : توجه للمكتب ديالو حل المجر و جبدو آاه المصحف : كاتقلبي على هذا ؟؟
مشيت بالجرا خديتو من عندو و تميت خارجة مهمتي سالات الحمد لله لي لقيتو ؛ يالاه بغيت نحل الباب ...
قصة للصبر حدود - الجزء 49
رافييل : مال غنى رفاهية كل نهار بنت !! هادشي كولو عمرو مانتج شي حاجة اسمها السعادة ، ولا الطمئنينة أبدا ؛؛ عايش و ماعارفش علاش عايش شنو المغزى من الحياة و من هادشي كامل ! ماذا بعد الموت .. أبوين عند بالهم المال هوما كلشي تحرمنا من الحنان و الحب كبرت وحداني و منطوي فهاد الدنيا مالقيتش شي حد يساندني نخوي عليه قلبي ! انحدرت من عائلة يهودية ولكن عمرني اقتانعت باليهودية و عمرو دخل لبالي .. عمرني عرفت على الإسلام شي حاجة من غير أنه دين الإرهاب و القتل و الإعتداء ! ولكن فهاد الأيام عرفت العكس عرفت الطريق لي كنت فاقدها من زمان او بالاحرى من طفولتي ، عرفت معنى الحياة ، و ها أنا الآن مسلم و انضممت للصفوف العائدين إلى الله ^^
طول المدة لي كنت كانسمع ليه كنت عاطياه بالظهر درت بدموع مجموعين فعيني دموع فرح و تأثر لمحت رافييل كيبكي في صمت و فنفس الوقت راسم ابتسامة على محياه
أنا : سي رافي.. قبل مانكملها قاطعني
رافييل : محمد هذا هو إسمي محمد
أنا (*_* أطلقت العنان لدموعي لي شقو طريقهم على خدودي ) : محمد يا الله
محمد : نتمنى تسمحي ليا على ما بدر مني فطول المدة لي كنتي خدامة هنا و نتمنى توصلي اعتذاري لمريم ، أعانك الله يمكن لك تفضلي
مازدت تا كلمة اكتفيت بالابتسام لأن فعلا لساني تربط و عجز عن النطق ...
قصة للصبر حدود - الجزء 50
هو ذاك أفضل إحساس ، طول الطريق الإبتسامة مافارقاتش محياي ، سبحان الله كلامه تعالى وحده كااف تماما ، دزت على محل الحلويات و خديت معايا الماكارون و فرحانة بزاف بلا قياس ؛ و بهاد المناسبة قررت ناخذ لمريم هدية ، توجهت لمحل إسلامي كيبيع أغراض و كتب و مصاحف و ألبسة شرعية ؛ تهت واو داكشي زويين حرت ماعرفتش اش ناخذ لها حاجة تنسيك فالأخرى .. فالأخير خديت لوحة صغيرة مكتوب فيها بالخط العربي إسم مريم و إسمي زيادة على مصحف التجويد .. غلفهم ليا أديت المبلغ و توجهت للمنزل مع الدخلة لقيت مريم غادة جاية تخلعات بزااف تعجبت لأن فعلا طبيعي و لكن كيما سبق ذكرت من أطيب خلق الله مريم إسم على مسمى ؛ عنقتها بأقصى جهد عندي و بقيت كانقز بالفرحة مافهمات والو !!
مريم : حفصة وا تبتي و قولي شنو ملرحك فرحيني معك كنت منتظرة تجي من تماك طالع لك الدم .. و نيت واش لقيتي المصحف ؟؟
حفصة : لقييتو و لله الحمد مايمكنش نتصور شي نهار يتيه ليا ؛ و احرزي شنو وقع تا خلاني بهاد الفرحة و السرور
مريم : همم ماعرفتش ربما عاملوك مزيان
أنا : أسلم يا مريم أسلم وووه
مريم ( حلات عينيها باندهاش و ضحكات تا بانو ضروسها ) : رافيييييل
انا : إيييه و اسمو الحالي محمد
مريم : يا ما شاء الله تبارك الرحمن الله أكبر و لله الحمد
أنا : سبحانك يا رب ، نوضي نصليو ركعتي شكر لله و ندعيو معه بالثبات و لينا أيضا ...
ليست هناك تعليقات