قصة كمال و هناء الجزء 6

قصة كمال و هناء
الجزء 6

مختار:السلوم شحال هادا ما هبط منو شي واحد، مغبر بزاف وهما هبطو منو وخلاو البصمات ديالهم عليه

احمد:اه بصح راه البلاصة منين شدوو السلوم ما فيهاش الغبرة.

مختار:على سلامتك ملي عقتي يالاه هبط نتبعوهم قبل ما يبعدو علينا.

احمد:اوكي نهبطو منين جينا ولا نهبطو غير من هنا نيت ؟

مختار:كاتسول فيا بحال الا انت بادي غير ليوم فالحرفة وبحال الا حنا عندنا الوقت باش نهبطو منين جينا، تبعني و سد عليا داك الفم عند لا نهرسوو ليك.

هبطو من السلوم ديال الحديد ودخلو ااغابة لي كانت ورا الدار وغادين تابعين كمال و هناء.

كانت واحد الطريق صغيرة وسط الغابة دخل منها مختار و قاليه احمد.

احمد:مالك دخلتي من هنا ؟

مختار:شفتك واقيلا نتا غير غادي و صافي !!

شووف الحيوان الاتر ديال رجليهم راه دازو من هنا خطية غادة معيا صافي.

احمد:جمع راسك من قبيلة وانا صابر عليك تعاير فيا عاين باين.

مختار وقف و احمد حتى هو وقف حيت بان ليه مختار جاي عندو و شدوو من جاكيط دالو وقاليه.

مختار:عاود شنوو قلتي !!

احمد خاف حيت عارف مختار خايب بزاف و ماكيسوااش و يقدر يقتلوو فديك الساعة.

احمد:مختار سمح ليا ولكن عياقتي عليا بالمعيور و كاطياح ليا من قيمتي.

مختار:عرفتي كوون ما قلتي ليا سمح ليا و الوقت لي ما عندناش كوون راك واقف دابا بلا راس فهمتي.

احمد تخلع و بدا يبرد الطرح وقال .

احمد:صافي اصاحبي يلاه نتبعوو دوك الدجاجات لا يفلتوو لينا من يدنا و نسى عليك هاد الهضرة لي قلت ليك انا مسامحك غير عايرني كيف بغيتي.

مختار طلق من احمد وقاليه بصح عندك الصح في هاد الهضرة لي قلتي زيد نتبعووهم ويلا شديتهم غادي نشرب من دمهم بجووج فهاد الغااااابة.

مختار و احمد ملي كانو كايهضرو كمال و هناء مازال كايجريو حتى صافي هناء قالت ليه.

هناء:كمال كمال انا صافي عييت !! والله حتى صافي الجهد باش نزيد خطوى مزال ما بقاش.

كمال:هناء غير زيدي عفااك صبري.

غير نوصلوو لواحد الفيلاج غادي نلقاو شي طاكسي كبير و لا كار نركبوو فيه

ونمشيو من هنا.

هناء صافي مسكينة عيات وضراتها رجليها وكتبكي و gلسات الارض.

هناء:كمال صافي سيير وخليني هنا،هرب انت وسمح ليا حطيتك فهاد الورطة.

كمال:هناء صبري ونوضي من الهضرة الخاوية عارفاني انا غادي نسمح فيك؟

كون بغيت نسمح فيك نهار الاول ما غاديش نجي باش ندافع عليك.

هناء:كمال بغيت نسولك علاش كادير معيا هاد شي كامل؟

كمال:راه قلت ليك اي واحد في بلاصتي غادي يدير هاد شي معاك ويجي يدافع عليك.

هناء:اه قلتيها ليا وحتى انا جاوبتك هاد شي ماش اي واحد يمكن يديرو،شكرا ربي يخليك سمح ليا كمال.

فالصراحة كمال غير كذب على هناء حيت بصح فهاد الزمان صعيب شي واحد يدير هاد شي لي دار كمال مع هناء يجي ويضحي براسو على قبلها،هاد شي كاين غير فالافلام والمسلسلات،ولكن الحقيقة كمال من اول شوفة شاف هناء عجباتو بزاف،وهناء واخا هكاك عارفة شنو كاين وكتسنى ف كمال يصارحها ويقول ليها بلي هيا كاتعجبو بزااف حيت حتى هناء كمال عاجبها بزااف.

كمال:هناء نوضي راه ما غاديش نسمح فيك.

هناء:كمال سير هرب وخليني عليك انا ماعندي حد فهاد الدنيا وزايدة ناقصة غير خليني نموت ونتهنى.

كمال:ياك اشنيولة تموتي ولمن تخليني انا،ولمن غادي نبقى نقول شنيولة؟

هناء:قولها لمرتك انشاء الله قوليها شنيولة،حيت غادي يجي شي نهار لا بقيت عايشة اصلا ونكون بوحدي مرة اخرى.

كمال شد يد هنا وجرها وقفات حداه وبقى يشوف ليها ف عينيها وقال ليها.

كمال:هناء انشاء الله غادي نقولها ليها غير سكتي و زيدي.

هناء:كمال طلق من يدي رجووع الله مالك درتي فيا هاد الشوفات وجارني حداك ياك لاباس.

كمال هز هناء وغادي بيها وكاتقوليه.

هناء:كمال حطني حطني غادي نطيح!

كمال:ياك رجلك ضراتك مافيك لي يزيد،ايوى سكتي.

هناء:واصافي قلت ليك حطني انا مشي بنت صغيرة باش تهزني.

كمال:صافي سكتي راه قربنا نوصلو راه الضو ديال الفيلاج بان ليا.

وصلو وكمال شاف واحد الطاكسي كبير واقف،حط هناء وشاد ليها فيدها غادة كاتعرج حتى وصلو عند مول الطاكسي وقاليه.

كمال:سلام ،عفاك اخويا بغيناك تدينا مراكش واش ممكن ؟

مول الطاكسي:سلام نتوما غير جوج صافي.

كمال:اه حنا غير جوج بشحال تدينا ؟

مول الطاكسي:غادي نديكم ب 400 درهم درت معكم غير المزيان وصافي.

هناء:400 درهم وكاتقول لينا درت معكم المزيان !!

كمال:هناء صافي سكتي.

هناء:اشمن هناء سكتي راه تيراا فينا هذا اووو بزااف.

مول الطاكسي:ختي حمدي الله ملي لقيتو بعدا غير لي يديكم من هنا راه المركوب قليل.

كمال جر هناء وقال ليها.

كمال:هناء صافي سكتي ملي نكون نهضر انا سكتي نتي خلينا نتفاهمو معاه يدينا نخويو هاد البلاصة وكيما قاليك نحمدو الله ملي لقيناه.

هناء:صافي انا ساكتا دير لي عجبك مهم عندك الفلووس ؟

كمال:اه هاز معيا شي حاجة غير زيدي.

كمال مشى عند مول الطاكسي و عطاه الفلووس و ركبوو هو وهنا اللور حدا بعضياتهم وشدوو طريق مراكش و كمال قال.

كمال:هناء فيا الجوع و بغيت غير نحل عيني نلقا راسي ناعس والله.

هناء:حتى انا بحالك فيا الموت ديال الجوع والنعاس والعيا والخوف من دوك المساخيط لي تابعينا.

مول الطاكسي سمع هناء و كمال ملي كانو كيهضرو بشوية وقال.

مول الطاكسي:واش فيكم الجوع،هاك هاد الميكة راه فيها واحد ربع ديال الدجاج والفريت ولاصوص وشوية الخبز كنت بغيت نتعشى بيهم ساعة واحد صاحبي تعشيت معاه دار الgاميلة.

كمال:الله يحفضك اخوية والله حتى درتي فينا خير كبير، شنو سميتك بعدا؟

مول الطاكسي:انا سميتي سفيان ساكن غير فداك الفيلاج منين هزيتكم، بصحتكم كولو رزقكم هداك.

كمال:شكرا خويا سفيان

يتبع...