قصة كمال و هناء - الجزء 7

قصة كمال و هناء
الجزء 7

سفيان:هانيا خويا بصحتكم.

هناء:شكرا ليك اخويا عتقتينا عرفتي فيا الموت ديال الجوع، واخا غليتي علينا المركوب.

كمال:هناء كولي و سكتينا.

سفيان:ههههه كاتفكريني في مرتي الله يرحمها كانت حتى هيا بحالك لي على فمها تقولوو ماكتسوقش،صافي غادي نحسب ليكم غير 300 درهم دخلتو ليا لخاطري حيت فكرتووني ف شبابي وشنوو دوزت ههههه

هناء:كمال شتي بارك عليا سكتي سكتي ها هو دابا نقص علينا 100 درهم.

كمال:والله نتي ما كتحشمي الشنيولة.

سفيان:ههههه شنيولة جات معها والله حتى نتوما علام.

كمال:هناء كولي راه غير كنضحكو و صافي نساو شوية الهم.

هناء:ومالي غادي نحير فيك انا غادي ناكل راه قتلني الجوع.

كمال و هناء كالو داك شي واخا مادار ليهم والو ولكن قداو الغراض بين ما وصلو لمراكش ويحن الله.

في الجهة الاخرى وصل مختار و احمد الفيلاج وقال مختار ل احمد.

مختار:احمد شفتي داك العساس خاصك تحايد داك شي على وجهك وحط وخبي داك السيف وسير سولوو واش شاف شي حد هنا بنت وولد و وريه ديك البطاقة المزورة ديال البوليس باش يعطيك المعلومات بخاطرو.

احمد:واخى هيا الاولى انا غادي عندو.

مختار بقى مخبي ورا واحد الشجرة مراقب الوضع واحمد مشى عند داك العساس قاليه.

احمد:سلام لاباس عليك الامور هانيا هنا؟

العساس:سلام شكون انت وكيفاش واش الاموور هانية هنا!

احمد:معاك المحقق هشام من الدار البيضاء وعندي ليك شي أسئلة وجوبني عليهم.

العساس:باش عرفتك انت محقق وريني البطاقة ديالك.

احمد جبد ديك البطاقة المزورة ووراها ليه وقاليه.

احمد:مطور مع راسك ما عندي ما يسالك.

العساس:صافي سمح ليا دابا تأكدت وسولني غادي نجوبك، ما مطور والو كون كنت مطور مانكونش عساس هنا هههه.

احمد:ههه هادي عندك مهم واش ما شفتيش واحد الشاب ومعاه بنت حالتهم ديال المدينة ماشي من هنا؟

العساس:واش واحد البنت و ولد؟

اه راه شفت واحد الجوج يالاه ركبو فواحد الطاكسي كبير.

وشدو ديك الطريق لي غادة ل مراكش,مالهم شنو دارو؟

احمد:راه قاتلين و هاربين,مهم تهلا فراسك غادي نمشي نتبعهم دابا.

احمد مشا تايجري عند مختار و قاليه.

احمد:مختار راه العساس قالي بلي ركبو فواحد الطاكسي كبير وشدو الطريق لي غادة لمراكش.

مختار:خاصنا نتبعوهوم باش ماكان. 

احمد:راه واحد الطومبيل نسرقوها و نتبعوهم.

مختار:اه فكرة مزيانة بعدا راك وليتي كاتفكر شويا اجي تبعني.

مشى مختار وشويا تبعو احمد.

مختار قال لأحمد: سير عند العساس لاهيه شويا بينما دخلت لطومبيل و صيفطو يجيب ليك شي حاجة من الداخل و غادي ندير ليك الضو ديال طومبيل واجي عندي باش نهربو. 

احمد:مختار انت راك خطار هادشي كولو عندك فداك راس ههه.

مختار:واا بنادم راه ماشي وقت الضحك هدا سير سربيني و دير داكشي لي قلتليك و سربينا.

مشا احمد عند العساس وقاليه.

احمد:عافاك نسيت ماسولتك على المواصفات ديال الطاكسي فاش مشاو وشويا قالييه عافاك جيبلي شي قرعة ديال الماء بارد راه عطشان.

ملي احمد كان كايهضر مع العساس ،مختار ديك الساعة حل الطوموبيل و دخل ليها وغير بان ليه العساس دخل و هو يديماري الطموبيل و دار ضو لاحمد وهو يجي عندو تايجري ركبو و هربو وخلاو لعساس غير البرد ملي خرج العساس ما لقاش احمد و قال.

العساي:بسم الله الرحمن الرحيم واش عفريت هادا فين طار !!

مختار:احمد هاد تكرفيس كامل لي دارو لينا غادي يخلصوه غادي نشد ديك هناء غادي ندبحها بيدي.

ملي كان مختار واحمد تابعين طاكسي الكبير لي فيه هناء و كمال ديك ساعة كانوو بعاد بواحد 100 km تقريبا وهناء عيات بزاف ونعسات ما حساتش براسها حتى حطات راسها على كتف كمال و نعسات و كمال عجبو الحال وقال مع راسوو.

كون تعرفي هناء شحال كانبغيك وما قدرتش نقولها ليك.

شوية بدات هناء كتهضر و هيا ناعسة و كاتقوول ( كمال.. كمال..ماتخلاش عليا). 

سفيان سمع هناء كتهضر و هيا ناعسة وقال.

سفيان:خويا شكون هاد كمال لي داير حالة في هاد البنت مسكينة يحسن عوانها.

كمال:انا هو كمال و ما داير والوو ا خويا غير مسكينة كاتحلم و كاتخرف ههه.

سفيان:اه كاتحلم مزيان ا سيدي راه غير كانضحك معاك نتلفوو شوية طريق و صافي.

كمال: خوود راحتك اخويا ضحك كيف بغيتي.

سفيان:الله يحفضك اخويا العزيز،عرفتي هاد الطريق اخويا مليتها والله و فايت واقع ليا واحد البلان هنا عرفتي غير كانوصل لهاد البلاصة بالليل كايتبورش عليا لحمي و راسي كايضرني الله يستر.

كمال:شنوو اخويا فايت واقع ليك هنا ياك لاباس.

سفيان:انا نعاودها ليك كيف الخرافة ولكن واش ديك البنت ناعسة بعدا لا تصدق مخلوعة لينا هنا.

كمال:اه ناعسة باينة واقعة ليك شي حاجة خايبة هنا.

سفيان:اه اخويا سمعني ، واحد المرة بالليل كنت بوحدي ف الفيلاج شاد نوبة ديالي انا اخر واحد غادي ندي شي ناس ل مراكش و نرجع بحالي خاوي باش ندخل بحالي عند وليداتي.

كمال:ايوى زيد كمل !

سفيان:مهم وصلت دوك الناس وضربت نصف الطريق و صلت حدا هاد الواد لي قدامك دابا وكايبان ليا شي واحد واقف من البعد مبانش ليا مزيان كانت شوية ضبابة درت اضواء الضبابة و قربت شوية وانا نشوف مرا واقفة لابسة الكحل و بحدها حدا الوااد فداك الوقت،انا دخلني الشك حيت شيرات ليا بيدها بغاتني نوقف باش نهزها،مهم انا تخلعت وزدت ف سرعة وغير بعدت شوية هازيت عيني فالمراية باش نشوفها وانا نتصدم !!

كمال:شنو طرا ا خويا ؟

سفيان:ما لقيتهاش فالبلاصة فين كانت واقفة شوية هازيت عيني نشوف فالطريق وانا نلقاها واقفة قدام الطريق بقيت غادي وكانقرا القرآن شوية وهي تغبر

كمال:ناري هاد شي كايخلع اخويا،هناء كوون سمعت هاد شي كون ماتت بالخلعة.

سفيان:انا مرضت فيها اخويا سيمانة ولكن دابا صافي بخير الحمد لله ما بقيت شفت والو من داك نهار كانقرا القرآن ونصلي وما نخاف من حتى حاجة.

كمال:بصح اخويا داك شي لي كاين هاد الحرفة عندكم صعيبة خصوصا تكون شاد الطريق بحدك بالليل.

سفيان:ايوى طرف ديال الخبز راه صعيب اخويا،هاهيا مراكش قريب ندخلو ليها.

كمال:اه اخويا الحمد لله ملي وصلنا بخير و على خير،هناء نوضي راه ما بقى لينا والو صافي قربنا ندخلو المدينة.

هناء:كمال داني نعاس مع العيا،فين وصلنا دابا؟

كمال:حنا دابا ف الدخلة ديال مراكش.

سفيان:انتي دابا راك ف مدينة النخيل كيما كيقولو ليها.

هناء:اه حمد لله ملي وصلنا بيخير وعلى خير،عرفتي كمال حلمت واحد الحلمة فشكل خايبة الله يستر.

كمال:خير وسلام شنو حلمتي؟

هناء:حتى من بعد ونقوليك شنو حلمت.

كمال:واخا هناء لي بغيتي على راحتك.

وصلو اخيرا لمدينة مراكش كانت عامرة واخا الليل ماشي بحال الفيلاج خاوي فيه غير الكلاب والمشاش مهم سفيان بغى يدخل المحطة وقال ليه كمال.

كمال: خويا سفيان واش ممكن توصلنا لهاد العنوان ؟

سفيان:خاصني نرجع بحالي دابا باش نرتاح فدار وصباح نوض نبدا الخدمة.

كمال:صافي خويا لا كان بحال هاكا غادي نشدو طاكسيصغير ماشي مشكيل.

هناء:سي سفيان كمل خيرك و دينا ما فيا لي يبقى يهبط من طاكسي لواحد اخور.

كمال:لا صافي خليه راه غادي يرجع مازال تابعاه الطريق.

سفيان:صافي والله حتى نديكم هانية غادي نبات هنا حتى الصباح ونمشي نيت راه عييت وفيا نعاس.

هناء:سير اخويا الله يرضي عليك.

سفيان:ههه امين.

كمال عطى العنوان ل سفيان ووصلهم مسكين حتى لدار لي ساكن فيها صاحب كمال.

هبطو من الطاكسي و توادعوو مع سفيان و شكروه بزاف وخلصوه..

ومشى بحالو وعطى نمرتو ل كمال و قاليه.

سفيان:لا حتاجيتي شي حاجة تاصل بيا.

كمال:شكرا خويا تهلا فراسك و سمح لينا صدعناك معنا.

سفيان:هانية يالاه بسلامة عليكم,فرصة سعيدة ويلا جيتو الفيلاج مرحبا بيكم عندنا فداري.

هناء:بسلامة عليك خويا تهلا فراسك.

مشى كمال وهناء دخولو واسط واحد الدرب خاوي ومعروف داك الدرب خايب ف مراكش،غادين حتى بانو ليهم 2 دراري واقفين فواحد القنت قربو عندهم وهناء كانت ما مرتحاش بقاو يشوفو فيهم وشوية واحد فيهم قصدهم، طويل و سمر فيه واحد الضربة فوجهو باينة فيه شمكار مع راسو وقاليهم.

شمكار:ناس زوينين اش حب الخاطر كاتقلبوو على شي حاجة !!

كمال:لا اخويا حنى غير غاديين عند واحد صاحبي ساكن هنا.

الشمكار:كيفاش حشومة تجيو تال سيكتوور ديالي وماتديو من عندي والوو.

هناء:خويا شنوو انديوو من عندك راه حنا ماشي من هنا غير جايين عند واحد الصديق حايد من طريقنا راك عطلتينا بالهضرة الخاوية.

شمكار:شوفي نتي غادي تسدي فومك و خليني نهضر مع هاد الفريكيس لي معاك.

كمال تعصب و هو يضرب داك شمكار بيدو لكمارتو حتى طاح الارض وهو ينوض وجبد موس و صاحبو جا كايجري جبد حتى هو موس و هناء تخلعات و بدات تبكي و تقوليهم بعدو منا واش حنى فين ما مشينا نلقاو الصداع ياربي اش هاد الموصيبة.

الشمكار:انا ضربني والله لا تفاكيت معاك، ضبرتي عليها هاد الليلة!

كمال:هناء سيري هربي.

هناء:لا كمال انا ما غاديش نخليك واخا نعرف نموت انا وياك هنا.

كمال:سيري هربي قلت ليك!

شمكار:ماعندها فين تهرب هاد البنت عجباتني وغادي تكوون ديالي.

كمال:والله حتى نجبد المك دوك العينين لا قستي شعرة وحدة منها.

شوية وهما يسمعو واحد الصوت كان قاصح وقال (العربي-عمر اش هاد شي!

واش الحمار بوكم انا ما غاديش نعس ولا شنو ديما مضاربين ليا مع الكليان)

العربي:سمح ليا اسي حمزة راه هو لي ضربني.

حمزة خرج من وسط الظلام بين الديور وغادي عندهم.

كمال:صاحبي حمزة !

حمزة:شكون خويا كمال ؟

هناء:كمال كاتعرف هاد الراجل ؟

كمال:هادا هو حمزة صاحبي لي جايين عندو.

هناء:حمد لله ملي خرج في اخر دقيقة اما كون راه موصيبة مع هاد الشمكارة.

حمزة عنق صاحبو كمال و سلم عليه و قاليه.

حمزة:توحشتك اصاحبي وا غبورات هادي من يمات كازا ما شفتك ههه

كمال:واييه يامات اصاحبي حمزة والله حتى انا توحشتك.

العربي وسعيد مافهمو والو وقال العربي.

العربي:واش كتعرفهم اسي حمزة سمح ليا اخويا ما قلتيش ليا بلي سي حمزة صاحبك هو لي انت جاي عندو.

كمال:وانت خليتيني فين نقوليك عند من جاين ولا عند من غادين.

سعيد:وا خويا ضربة هيا عندك بان ليا العربي تهز فسما.

العربي:وا حنكي تبنج عليا التبويقة طارت ليا هههه ولكن هانيا ضياف ديال سي حمزة. 

حمزة:والله كون درتو ليهم شي حاجة حتى نقتل جد بوه شي واحد فيكم.

هناء:صافي اسي حمزة ربي يخليك مهم ما طرى والوو حمد لله.

حمزة:كمال ما عرفتينيش على هاد البنت؟

كمال:هادي هناء صديقتي.

حمزة:مشرفين بيك هناء مهم يالاه ندخلو الدار مرحبا بيكم.

كمال:العربي سمح ليا على ديك الضربة.

العربي:هانيا خويا ماشي مشكيل مولفين ههه.

هناء شافت فالعربي وتمت غادا مع كمال و حمزة لدار وقالت مع راسها بنادم كيف ديار قاليك بغى ياخدني والله لمك حتى نصفيها ليك حتى انت.

نرجعو عند مختار واحمد قربو يدخلو لمراكش وكان غادي مختار بواحد السرعة كبيرة ملي قربو الدخلة ديال مراكش بان ليهم واحد الطاكسي فيه نفس المواصفات لي قال العساس لاحمد واقف في جنب الطريق واحمد قال ديك الساعة ل مختار.

احمد:مختار تكايس شوية.. وقف..وقف،راه واحد طاكسي نفس النعت لي عطاني العساس بلا شك غادي يكون وصلهم وراجع.

مختار:واش متأكد بلي هو هذا ؟

احمد:اه راه هو متأكد غير رجع خليني نهبط نسولو فين حطهم.

مختار:واخا سولو قوليه انت محقق وكتحقق فواحد الجريمة دارها واحد الشاب معاه واحد البنت هربانين وكانو فالفيلاج وداهم واحد الطاكسي من الفيلاج لمراكش وشاكين بلي انت هو مول الطاكسي لي وصلهم.

رجع مختار ووقف ورا الطاكسي هبط احمد ومشى عند سفيان وقاليه.

احمد:سلام ممكن نسولك عفاك معاك الشرطة.

سفيان:سلام واخا مرحبا ولكن وريني شي بطاقة باش نعرفك بعدا انت واش من الشرطة !

احمد:جبد البطاقة المزورة ووراها ل سفيان وقاليه تأكدتي دابا.

سفيان:اه تأكدت دابا،قوليا على شنو بغيتي تسولني انا نشوف واش نقدر نعاونك ؟

احمد:بغيت نسولك على واحد جوج بنت ومعها ولد طويل شوية واش شفتيهم ولا هزيتيهم من الفيلاج ووصلتيهم مراكش ؟

سفيان:اه وصلت بنت و ولد غير دابا وحطيتهم فين بغاو وجيت علاش ياك ما كاين باس ؟

احمد:واش بصح هاد شي لي قلتي !! راه عندك الزهر ملي ماقتلوك راه هادوك راه عصابة كيقتلو اي واحد من بعد ما كياخدو ليه رزقو !!

سفيان:اوااه واش هاد شي بصح ! دوك جوج ما بيناش عليهم و ضريفين بزاف.

احمد:هههه راه هما هادوك صافي دابا انا متأكد 100% ،غادي تدينا تورينا فين حطيتيهم.

سفيان:ناري ما بقات تيقا فهاد الزمان عندي زهر و صافي ملي انا باقي حي.

سد سفيان طاكسي و ركب مع احمد و مختار وقال.

مختار:سلام خويا شكرا على تعاون ديالك معنا.

سفيان:لا ماتشكرنيش هادا واجب عليا باش تشدو دوك المجريمين والله ما بينا عليهم.

احمد:عرفتي علاش ضحكت قبيلة،حيت هاديك هي الخطة لي كايديرو الناس باش يتيقوو فيهم و من بعد يديو ليهم رزقهم و يقتلوهم حفضك الله اخويا.

سفيان:والله حتى بصح غير حفضني الله منهم و صافي، وباش تعرفني مصفيها عاطيهم يتعشاو.

مختار دار شاف في احمد و دار واحد التبسيمة ديال الشر واحمد حتى هو وقال.

سفيان:احنا دابا فالبلاصة لي قلتي لينا منين غادي ندوزو؟

سفيان:شوف فين واقفة ديك الطموبيل الزرقة لي قدام داك الكاميو دور على ليسر ومن بعد دور على ليمن ووقف.

مختار:صافي هنا فين حطيتيهم؟

سفيان:اه هنا حطيتهم وراه دخلو وسط داك درب.

احمد:شكرا خويا سفيان دابا غير سير عند الطاكسي ديالك بلا ما نزيدو نبرزطوك غادي نديروو خدمتنا ونشدوهم.

سفيان غير بغا يخرج من الطموبيل يمشي بحالو وبانو ليه السيوفة ديال احمد و مختار ودخلو الشك وهو يقول ل مختار.

سفيان:خويا عفاك بغيت نسولك.

مختار:تفضل سول واش كاين شي مشكيل؟

سفيان:لا ما كاين حتى مشكيل غير بغيتك توريني البطاقة ديالك ديال البوليس !!

مختار رتابك و قال ليه.

مختار:اه واخا انا غادي نوريها ليك هبط مختار من الطموبيل و دار عند سفيان و هو يقول ليه.

مختار:بغيتي تشووف البطاقة ديالي ياك ؟

سفيان دخلوو شك وقال:انا والله ما عجبتوني نتوما وشاك فيكم!

احمد هبط و بدا كايضحك واحد الضحك ديال الشر والغدر.

مختار:احمد وريه البطاقة ديالي راه بغا يشوفها الأخ.

احمد:هيا الاولى حشومة نخليه يتسنى.

سفيان:شكون نتوما انا غادي نعلم بيكم السلطات.

قبل سفيان ما كمل هضرتو ضربو احمد بواحد الموس حتى دم خرج ليه من فمو وطاح الارض.

مختار:هادي هيا البطاقة ديالي كيف جاتك ؟

سفيان كاتخرج ليه الهضرة بزز..

سفيان:حرااااام ع....ليكم ،اااش بغيتووووو عان....دي.

مختار:حيت ما بغيتيش تمشي بحالك ودخل سووق راسك العشير جبتيها فرااسك موت بشوية عليك هههه

احمد:خليه دابا غادي يدخل سوق راسو بمرة.

سفيان مسكين مات فبلاصتو ومختار قال.

مختار:احمد هز هاد خونا لوحو فالكوفر ديال الطومبيل نديوها نلوحوها فشي واد ونرجعو هنا نقلبو على خوتنا.

يتبع...